Засталося літаральна некалькі дзён да таго часу, калі бадзёрыя школьныя званкі ўрачыста абвесцяць аб заканчэнні чарговага вучэбнага года. Многія хлопчыкі і дзяўчынкі Асіповіччыны правядуць летнія канікулы арганізавана.

Як паведамілі ў аддзеле адукацыі, спорту і турызму райвыканкама, сёлета 845 школьнікаў ад-правяцца ў лагеры з кругласутачным знаходжаннем, у тым ліку 610 — у стацыянарныя “Пціч” і “Родник”, 130 — у профільныя 9-дзённыя, 55 — на поўны тэрмін, а 50 чалавек спалучаць адпачынак з рабочым часам у лагерах адпаведнага накірунку.

850 вучняў у спісах наведвальнікаў летнікаў з дзённым знаходжаннем, у тым ліку працы і адпачынку — 70 хлопчыкаў і дзяўчынак. Функцыянаваць лагеры будуць пры ўсіх сярэдніх школах і вучэбна-педагагічных комплексах, у раённых дзіцяча-юнацкай спартыўнай школе і цэнтры творчасці дзяцей і моладзі, а таксама цэнтры карэкцыйна-развіваючага навучання і рэабілітацыі.

Школьныя лагеры распачнуць работу ўжо ў другі дзень лета, а працягнецца змена да 25 чэрвеня. Хлопчыкаў і дзяўчынак чакае трохразовае збалансаванае харчаванне, вітамінізацыя. Бацькоўская даплата вар’іруецца ў залежнасці ад узросту дзяцей і складзе не больш за 300 тысяч рублёў.

Як заўсёды, для наведвальнікаў лагераў будуць арганізаваны цікавыя экскурсіі, турыстычныя паходы, спартыўныя спаборніцтвы, конкурсы мастацкай самадзейнасці і шмат іншых цікавых заняткаў.