У прыгожы сонечны дзень, калі, здаецца, вясна ўрэшце ўступіла ў свае правы, у РЦК адбылося традыцыйнае пасяджэнне клуба педагагічных сустрэч. I арганізатарам мерапрыемства, дзякуючы насычанай і цікавай праграме, удалося стварыць утульную і цёплую атмасферу.

Распачаў віншавальную праграму намеснік старшыні райвыканкама Аляксандр Шаўлюга. Ён выказаў думку, што жанчыны, як і сама вясна, увасабляюць сабой гармонію і прыгажосць, і таму 8 Сакавіка ім прызначаны ўсе кветкі і ўсмешкі, словы падзякі і самага шчырага прызнання.

Аляксандр Вікенцьевіч уручыў Ганаровыя граматы райвыканкама загадчыцы дзіцячага сацыяльнага прытулку Алене Хроп і намесніку дырэктара па выхаваўчай рабоце гімназіі Ларысе Чаропка (на здымку). Падзячнымі лістамі старшыні райвыканкама ўзнагароджаны настаўніца рускай мовы і літаратуры СШ № 3 Рыта Лагімахава і загадчыца ясляў-сада № 6 “Сонейка” Алена Ясакава. Асіповіччына багатая на таленавітых і працавітых настаўнікаў, таму шмат хто з іх быў адзначаны яшчэ Ганаровымі граматамі ўпраўлення адукацыі Магілёўскага аблвыканкама, аддзела адукацыі, спорту і турызму райвыканкама, а таксама прэзідыума асіповіцкага райкама прафсаюза.

Шчырымі і запамінальнымі атрымаліся віншаванні начальніка аддзела адукацыі, спорту і турызму райвыканкама Наталлі Шаўчэнка і старшыні раённага камітэта прафсаюза работнікаў адукацыі і навукі Алены Кулакоўскай. Яны заклікалі мужчын ажыццяўляць усе мары сваіх дам сэрца, таму што кожная жанчына павінна быць шчаслівай. Не пакінула гледачоў раўнадушнымі і выступленне метадыста аддзела адукацыі, спорту і турызму Антаніны Нілавай, якая прадэкламавала верш Э.Асадава.

Эмацыянальна насычаным атрымаўся і святочны канцэрт. Парадаваў вока кветкавы падарунак тэатра авангарднай моды “Fashion House” — мадэлі пакарылі вытанчанасцю, яркасцю і незвычайнасцю сваіх убранняў. Жыццярадаснасцю і аптымізмам зарадзілі прысутных удзельнікі вакальнай групы “Сяброўкі” ў час выканання папуры з вядомых і ўсімі любімых песень.

Наогул на працягу ўсяго святочнага мерапрыемства ў адрас жанчын гучала шмат добрых і цёплых слоў. I віншаванні-пажаданні знайшлі водгук у сэрцах, на тварах педагогаў ззялі ўсмешкі, вочы былі напоўнены радасцю…