Интересная история этнографического уголка «Белорусский дом» Осовского УПК

Музейны экспанат

Не парываецца сувязь…

З пачатку 80-х гадоў тагачасны дырэктар Дзераўцоўскай школы Людміла Жукава пачала збіраць у суседніх вёсках прадметы побыту былых пакаленняў, каб стварыць музейны куток. Больш за чвэрць стагоддзя таму школа была зачынена, вучняў перавялі ў новы будынак у вёсцы Осава, а разам з імі пераехала і “Беларуская хатка”. Кожны экспанат, а іх тут налічваецца каля 85, перададзены на захоўванне мясцовымі жыхарамі. Адметна тое, што людзі не проста валодалі і карысталіся гэтымі рэчамі, але большасць з іх вырабілі самі. Так, тканы дыван і адзенне ХIХ стагоддзя — справа рук мясцовай умеліцы Ульяны Петкінай, а вось саламяныя лапці і капялюш перадалі ў спадчыну Леаніду Белабародаму яго бацькі. Дарэчы, ён таксама захапляецца саломапляценнем. Сучасная майстрыха Паўліна Вабішчэвіч падрыхтавала спецыяльна для этнаграфічнага кутка ручнікі, абрусы і некаторую вопратку. Іх яна вышывала па традыцыйных старажытных узорах. Яшчэ адзін экспанат мае сучасную гісторыю. Дзевяцікласнікі пад кіраўніцтвам настаўніка гісторыі Людмілы Жукавай стварылі міні-мадэль ткацкага станка, якая таксама захоўваецца ў кутку. Выраб не толькі паўтарае ўсе дэталі свайго прататыпу, але з’яўляецца рабочым.