Алена Міхайлаўна нарадзілася ў 1971 годзе ў вёсцы Лапічы. Скончыла Лапіцкую СШ у 1988 годзе, у 1991-м паступіла ў Беларускі дзяржаўны ўніверсітэт на філалагічны факультэт.

Педагагічную дзейнасць пачала ў Селецкай сярэдняй школе Пухавіцкага раёна яшчэ ў 1988 годзе, папрацаваўшы піянерважатай і пераканаўшыся ў тым, што хоча займацца менавіта справай навучання і выхавання падрастаючага пакалення.

У Жорнаўскай СШ з 2000 года. Спачатку працавала настаўнікам рускай мовы і літаратуры. З 2003 г. — намеснік дырэктара па выхаваўчай рабоце, праз дзесяць гадоў была прызначана намеснікам дырэктара па вучэбна-выхаваўчай рабоце, з 2022 г. — намеснік дырэктара па вучэбнай рабоце.

За чвэрць веку Алена Міхайлаўна дала веды не адной сотні вучняў, кожны з якіх знайшоў свой жыццёвы шлях. Многімі выпускнікамі можа ганарыцца, напрыклад стыпендыянтам спецыяльнага фонду Прэзідэнта краіны па падтрымцы таленавітай моладзі Мікітам Бабковым.

На новай пасадзе будзе старацца захоўваць традыцыі, закладзеныя яе папярэднікам Мікалаем Пішчовым. На яе думку, менавіта тое, што ўстанова адукацыі, у якой працуе, нібы адна сям’я, дзе адносіны паміж удзельнікамі педагагічнага працэсу будуюцца на аснове супрацоўніцтва, узаемаразумення і ўзаемадапамогі, максімальна садзейнічае матывацыі вучняў і эфектыўнасці засваення імі ведаў і ўменняў. Наглядным пацвярджэннем можна лічыць тое, што многія выпускнікі набываюць педагагічныя прафесіі. Дарэчы, шасцёра з іх зараз працуюць у роднай школе.