Дырэктар ДУА “Лапіцкая сярэдняя школа” Таццяна Кацуба

Нарадзілася ў вёсцы Цэль у 1980 годзе. У 1997-м скончыла Цэльскую сярэднюю школу і паступіла ў Магілёўскі педагагічны каледж імя К. Ушынскага, навучанне ў якім завяршыла дыпломам з ад-знакай па спецыяльнасці “настаўнік пачатковых класаў, педагог-арганізатар”.

Адукацыю Таццяна Мікалаеўна працягнула ў Магілёўскім дзяржаўным педагагічным універсітэце імя А. Куляшова, які скончыла ў 2002 годзе, атрымаўшы кваліфікацыю “выкладчык” па спецыяльнасці “пачатковая адукацыя”.

З 2000 года па размеркаванні працавала настаўнікам пачатковых класаў Радуціцкага вучэбна-педагагічнага комплексу дзіцячы сад-пачатковая школа. Праз год перавялася на тую ж пасаду ў Цэльскую сярэднюю школу. 20 лютага 2012 года стала настаўнікам пачатковых класаў у Лапіцкай сярэдняй школе. У 2015-м была назначана на пасаду намесніка дырэктара па вучэбнай рабоце. Праз тры гады атрымала вышэйшую кваліфікацыйную катэгорыю. З 7 красавіка Таццяна Мікалаеўна займае пасаду дырэктара ўстановы.

У планах новага кіраўніка павелічэнне колькасці паслуг па пазаўрочнай дзейнасці, фарміраванне мадэляў вучнёўскага самакіравання і развіцця школы праз даследчую дзейнасць і алімпіядны рух, а таксама садзейнічанне стварэнню профільных класаў.