Прымеркаваная да прафесійнага свята педагогаў урачыстая сустрэча прай-шла ўчора ў РЦК,  і яе галоўнымі атрыбутамі  сталі кветкі, пажаданні і добры настрой. Праграма была складзена так, што нават далёкі ад педагагічнай дзейнасці чалавек мог уявіць сабе ўсе шматгранныя бакі і «лёгкасці» гэтай нівы. Хаця, безумоўна, стваральнай радасці і добрых эмоцый у ёй значна больш, чым адмоўнага.

Педагогаў Асіповіччыны віншавалі намеснік старшыні райвыканкама Аляксандр Шаўлюга, начальнік аддзела адукацыі, спорту і турызму райвыканкама Наталля Шаўчэнка, старшыня райкама прафсаюза работнікаў адукацыі і навукі Алена Кулакоўская і іншыя. І кожны з выступаючых жадаў ім моцнага здароўя і плёну ў працы, натхнення і  ўдзяч-ных вучняў.

Многія атрымалі за-служаныя ўзнагароды. Напрыклад, 3 чалавекі адзначаны Ганаровымі граматамі райвыканкама, Ганаровымі граматамі Міністэрства адукацыі ўзнагароджаны намеснік начальніка аддзела адукацыі Міхаіл Грыгорчык і дырэктар Каменіцкага ВПК Людміла Шавялёнак, Граматамі — настаўнік працоўнага навучання Вяззеўскай СШ Аляксандр Ляўкоў, метадыст РВМК Антаніна Нілава, педагогі дадатковай адукацыі Ірына Церабільнік і Васілій Цынкевіч, галоўны спецыяліст аддзела адукацыі Алена Хаецкая. Амаль паўтара дзясятка настаўнікаў выклікаліся за Ганаровымі граматамі ўпраўлення адукацыі аблвыканкама, больш за дваццаць — раённага аддзела. Адзначыў лепшых таксама прэзідыум райкама прафсаюза.

Асаблівай увагай на свяце надзялілі ветэранаў педагагічнай працы. У іх бок гучалі шчырыя пажаданні не толькі з нагоды прафесійнага свята, але і Дня пажылых людзей.

Запрашаліся на сцэну і маладыя спецыялісты. Адметна, што з 16 прыбыўшых у раён пачынаючых настаўнікаў 12 — выхадцы з Асіповіччыны. Значыць, ёсць падставы спадзявацца, што яны тут і застануцца.

Песні, танцы, вершы, тэатралізаваныя пастаноўкі ў выкананні юных артыстаў і педагогаў зрабілі сустрэчу цёплай і незабывальнай.