Асіповічы: званок апошні, што клікае наперад
Бягучы тыдзень на Асіповіччыне, як і ва ўсёй краіне, распачаўся мерапрыемствамі, прысвечанымі апошняму школьнаму званку. Асабліва важны і хвалюючы гэты час для адзінаццацікласнікаў: наперадзе экзамены, выпускныя вечары, цэнтралізаванае тэсціраванне і паступленне.
У гарадской СШ № 4 сёлета два выпускныя класы, атэстаты аб сярэдняй адукацыі належыць атрымаць 34 вучням. У двух з іх ёсць магчымасць пры паспяховай здачы іспытаў скончыць школу з медалём.
Свята апошняга званка атрымалася тут рознабакова цікавым: гучалі шчырыя віншаванні і наказ на будучыню, выпускнікі разам станцавалі школьны вальс, першакласнікам быў урачыста ўручаны сімвалічны ключ ад школы. Граматамі за выдатную вучобу ўзнагароджаны тры дзясяткі вучняў розных паралеляў, а каштоўным падарункам — лепшы клас, якім сёлета прызнаны 6 “А”. Рознакаляровыя паветраныя шары панеслі задуманыя выпускнікамі жаданні ў блакітную вышыню.
— Будзем сумаваць па такіх добрых юнаках і дзяўчатах, — падзялілася пасля завяршэння лінейкі дырэктар школы Ганна Маісеенка. — Дружныя, спагадлівыя, актыўныя. Спадзяёмся, кожнаму з іх пашанцуе паступіць у абраную па душы вучэбную ўстанову.
І сапраўды, няхай пашчасціць з выбарам прафесіі ўсім, хто сёлета развітваецца са школай, а праз некалькі гадоў працоўныя рады раёна і не толькі папоўняцца маладымі надзейнымі кадрамі.
Валянціна КОРБАЛЬ. Фота Ніны ЦАРЫК.
