Днямі ў раённым Цэнтры
культуры прайшло адно з традыцыйных мерапрыемстваў школьнай
супольнасці — ушанаванне вучняў школ і выхаванцаў цэнтраў творчасці дзяцей і
моладзі, турызму і краязнаўства, фізічнага выхавання, якія сталі пераможцамі
міжнародных, рэспубліканскіх і абласных алімпіяд, творчых і інтэлектуальных
конкурсаў, акцый, спартыўных і турыстычных спаборніцтваў, а таксама іх
педагогаў.

З прывітальным словам да
ўсіх прысутных звярнуўся намеснік старшыні райвыканкама Аляксандр Шаўлюга. Ён
павіншаваў таленавітых асіпаўчан з заслужанымі перамогамі і выказаў надзею, што
яны стануць дастойнай зменай старэйшага пакалення, якое чакае ад моладзі
крэатыўных ідэй, гарачых сэрцаў, моцных рук і, безумоўна, новых адкрыццяў і
стваральнай працы на карысць радзімы. У звароце да педагогаў Аляксандр
Вікенцьевіч падрэсліў іх высокі прафесіяналізм, які дазваляе паспяхова
канкурыраваць на рынку адукацыйных паслуг з педагогамі не толькі іншых рэгіёнаў
краіны, але і замежжа. А гэта значыць, што і ў будучым вялікае творчае сузор’е
настаўнікаў і вучняў прынясе роднаму краю не адну перамогу, шчодра папоўніць
інтэлектуальны патэнцыял беларускай нацыі.

Амаль дзве гадзіны
цягнуліся ўрачыстасці з цёплымі словамі і ўзнагародамі. Па сціплых падліках,
прагучала больш за 200 прозвішчаў адораных вучняў, якія прынеслі славу раёну.
Сярод іх — навучэнцы гімназіі, усіх агульнаадукацыйных школ горада, Вяззеўскай,
Ялізаўскай, Лапіцкай, Свіслацкай, Цэльскай, Дараганаўскай, Ясенскай,
Градзянецкай і Жорнаўскай, выхаванцы ўстаноў дашкольнай адукацыі. Некаторыя
імёны называліся па некалькі разоў. Калі ж намаляваць іх калектыўны партрэт, то
яго асноўныя штрыхі — стараннасць, працаздольнасць, дапытлівасць, творчасць і
крэатыўнасць.

З вялікім пачуццём гонару
за “зорных” дзяцей на “п’едэстал” падымаліся людзі, якія прафесіянальна робяць
усё магчымае, каб падрастаючае пакаленне магло ўпэўнена пракласці дарогу ў
паспяховае “заўтра”. Такіх педагогаў прынята называць сапраўднымі. Многія з іх
даўно вядомы ў раёне і за яго межамі, яны не аднойчы адзначаліся ў ліку лепшых.
I гэтая цырымонія ўзнагароджвання, думаецца, не апошняя. Дарэчы, спонсарам
мерапрыемства выступілі раённая арганізацыя РГА “Белая Русь” і аддзел па
справах моладзі райвыканкама.

Не змаўкалі на свяце
талентаў музыка і песні. Радавалі гасцей у зале сваімі выступленнямі ўдзельнікі
мастацкай самадзейнасці Цэнтра творчасці дзяцей і моладзі, юныя артысты з СШ №№
2, 3 і Пратасевіч.

Непрыкметна ўрачыстае
дзейства пады-шло да заканчэння. Для кагосьці з вучняў яно апошняе ў сённяшнім
калектыве — стануць студэнтамі і будуць заваёўваць новыя вяршыні. Некага
чакаюць няскончаныя творчыя праекты, а камусьці трэба папрацаваць над сабой,
каб узняцца яшчэ вышэй. Але цяпло і ўзвышанасць, якія панавалі ў зале, яшчэ
доўга будуць саграваць яго ўдзельнікаў.

Ніна ВIКТОРЧЫК.