Асіпаўчанін Кірыл Альховік атрымаў першае месца ў рэспубліканскім этапе конкурсу “Квітней, мой лес!”.

А яго работа “Уплыў канструкцыі рагатых вулляў Палівады на прадукцыйнасць меданоснасці пчаліных сямей розных парод”, якую ён падрыхтаваў пад кіраўніцтвам педагога Святланы Зайцавай, знойдзе практычнае прымяненне ў рабоце мясцовага лясгаса.

Пчалярства — фамільная справа сям’і Альховікаў. Хлопчык адносіць сябе да чацвёртага пакалення пчаляроў, прычым продкі як па татавай, так і па матулінай лініі займаліся атрыманнем мёду. Кірыл навучыўся даглядаць пчол ад свайго таты. Да агульнай справы мае дачыненне і яго старэйшая сястра Алёна. Дарэчы, яна калісьці таксама пісала навуковую работу, звязаную з пчоламі. А Кірыл, які прывык усё рабіць грунтоўна, паглыбіўся ў тэму далей. Ён вывучыў вопыт пчаляра з Украіны Міхаіла Палівады і вельмі здзівіўся, што яго прагрэсіўны вопыт не выкарыстоўваецца ў нашай краіне.

Будаваць інавацыйныя вуллі Кірыл з татам пачалі чатыры гады таму. Па рэкамендацыях знакамітага пчаляра бацька і сын Альховікі вырабілі эксперыментальную партыю з васьмі домікаў: старэйшы наразаў дошкі, малодшы займаўся зборкай канструкцыі і занатоўваў назіранні за пчоламі. Назапасіўшы пэўны вопыт, змаглі пераканацца ў эфектыўнасці метада.

Рагатыя вуллі Палівады маюць шэраг адметных асаблівасцей: яны варыятыўныя і даюць волю фантазіі пчаляра. Напрыклад, у Кірыла домік для меданосных насякомых складаецца з шасці карпусоў. Спачатку ўстанаўліваюцца тры, два ідуць пад расплод, а трэці ўтрымлівае запас мёду на зіму. Калі пчолы пачынаюць раіцца, дадаюцца новыя паверхі. У мадэлі Кірыла іх усяго шэсць Пасля трэцяга ўстанаўліваецца раздзяляльная рашотка, праз ячэйкі якой пчолы дастаўляюць мёд у верхнія ярусы, а матка застаецца знізу, каб разводзіць расплод. Хлопчык лічыць, што такіх рашотак можна адначасова выкарыстоўваць да васьмі штук.

У вуллях новай канструкцыі Кірыл бачыць толькі плюсы: яны простыя ў аб-слугоўванні, лёгкія ў вытворчасці, зручныя ў транспарціроўцы, бо кожны, нібы дзіцячы трансформер, можна разабраць і скласці па-новаму. Але галоўная перавага — пераезд пчол у такое жыллё “палепшанай планіроўкі” павялічвае вытворчасць мёду. “З дапамогай гэтага нескладанага збудавання ад адной пчоласям’і можна атрымаць да 70 кілаграм прадукцыі”, — сцвярджае школьнік-рацыяналізатар.

Навуковы кіраўнік Кірыла Святлана Зайцава адзначае, што СШ № 3 з’яўляецца цэнтрам устойлівага развіцця вобласці і работа яе вучня дазволіць нашаму рэгіёну развівацца ў дадзеным кірунку. Яна адзначае, што аўтар работы вельмі рухавы, эрудзіраваны хлопец, душа калектыву. Ён скончыў рэспубліканскую “Школу юных лесаводаў” з адзнакай і за што б ні ўзяўся, кожную справу даводзіць да канца.

Кірыл плануе і далей займацца інавацыямі ў галіне пчалярства, у яго ўжо ёсць новыя ідэі.

Намеснік дырэктара Асіповіцкага доследнага лясгаса па ідэалогіі Алеся Аўдзей упэўнена, што работа Кірыла Альховіка будзе карысна для лясной гаспадаркі раёна, у якой налічваецца пасека ў 70 вулляў, і павышэнне яе прадукцыйнасці — важная задача прадпрыемства.