Днямі ў Магілёве праходзіў абласны этап конкурсу
“Лепшы выхавальнік-2011”, і сярод 25 удзельнікаў менавіта прадстаўніца
Асіповіччыны Антаніна Нілава, педагог з ДУА “Яслі-сад № 8 “Чабурашка”,
вызначана пераможцай.

Конкурс складаўся з некалькіх тураў. Так, на
завочны трэба было прад’явіць партфоліа і відэакліпы — тут Антаніне Антонаўне
не было роўных. Няпростым заданнем было правесці заняткі ў прапанаванай
арганізатарамі групе аднаго з магілёўскіх дзіцячых садоў. Апошні дзень
педагагічных спаборніцтваў, які праходзіў на базе Магілёўскага дзяржаўнага
ўніверсітэта імя А.Куляшова, уключаў сама-прэзентацыю дзейнасці выхавальнікаў,
абранага імі крэда.

Незвычайным і крэатыўным быў конкурс “Пытанне на
засыпку”, які складаўся з відэаролікаў са шматлікімі дзіцячымі “чаму?”. Канечне,
перш чым даць адказ, трэба было добра і хутка — давалася ўсяго 30 секунд —
падумаць, як можна растлумачыць малым, чаму ў макаронах ёсць дзірачкі, у
вясёлцы шмат колераў, а з каменю не выціскаецца вада…

Антаніна Антонаўна пакарыла журы глыбокім
веданнем псіхалогіі дашкалят, валоданнем таямніцамі свету маленства. Якраз
апошняе і дапамагло стаць лепшай сярод дастойных сапернікаў.