У пышную крону дрэў украпіліся першыя жоўтыя
лісточкі, дні заўважна пакарацелі, завяршылася ўборка зерневых — да гэтых
прыкмет набліжэння восені дабавілася яшчэ адна: у прасторнай зале раённага
Цэнтра культуры сабраліся настаўнікі на традыцыйную педагагічную канферэнцыю.

З прывітальным словам выступіў старшыня
райвыканкама Пётр Шукаловіч, які, агучыўшы дасягненні раёна, станоўча адзначыў
уклад у агульную справу педагогаў.

На форуме прысутнічалі дырэктар ДУА
“Магілёўскі абласны цэнтр фізічнага выхавання і спорту навучэнцаў і
студэнтаў” Аляксандр Шайтораў, начальнік аддзела аховы правоў дзяцінства і
спецыяльнай адукацыі ДУА “МДАІРА” Валянцін Жыдкоў. Яны павіншавалі
усіх педагогаў Асіповіччыны з новым навучальным годам, пажадалі далейшых
поспехаў. За дасягненні на ніве асветы граматамі Міністэрства адукацыі
Рэспублікі Беларусь узнагароджаны намеснік дырэктара па вучэбнай рабоце ДУА
“САШ № 1 г.
Асіповічы ім. Б.М.Дзмітрыева” Наталля Паўлава, дырэктар ДУА
“Свіслацкая сярэдняя школа” Ірына Сямашка, настаўнік пачатковых
класаў ДУА “Ялізаўская сярэдняя агульнаадукацыйная школа” Галіна
Арабей.

За добрасумленную працу звыш 30 лепшых педагогаў
былі заахвочаны Ганаровымі граматамі ўпраўлення адукацыі Магілёўскага абласнога
выканкама, Магілёўскага абласнога камітэта прафсаюза работнікаў адукацыі і
навукі, Асіповіцкага райвыканкама, аддзела адукацыі Асіповіцкага райвыканкама,
Асіповіцкага раённага камітэта прафсаюза работнікаў адукацыі і навукі,
Падзячным пісьмом старшыні Асіповіцкага раённага Савета дэпутатаў.

Начальнік раённага аддзела адукацыі Наталля
Шаўчэнка зрабіла дэталёвы аналіз дзейнасці ўстаноў адукацыі за 2010/2011
навучальны год, акрэсліла задачы на перспектыву. Прагучала вы-ступленне
старшыні Асіповіцкай раённай арганізацыі прафсаюза работнікаў адукацыі і навукі
Алены Кулакоў-скай, якая ў паэтычных радках ахарактарызавала дзейнасць калег.

Шмат творчых калектываў педагогаў працуе ў нашым
раёне. Пачэсную і адказную місію выконвае ўстанова адукацыі “Асіповіцкі
дзяржаўны прафесійна-тэхнічны каледж”, які рыхтуе спецыялістаў па 23
кваліфікацыях. Педагогі і навучэнцы прадставілі ўдзельнікам канферэнцыі
прэзентацыю сваёй дзейнасці. Вопытам кіраўніцтва адукацыйным працэсам
па-дзялілася дырэктар ДУА “САШ № 4 г. Асіповічы” Ганна Маісеенка. Аб тым,
як арганізавана работа па маральна-прававым выхаванні на самай першая прыступцы
сістэмы адукацыі паведаміла загадчык дзяржаўнай установы адукацыі
“Асіповіцкі дашкольны цэнтр развіцця дзіцяці” Таццяна Васянкіна, а
намеснік дырэктара па выхаваўчай рабоце ДУА “САШ № 2 г. Асіповічы” Святлана
Голубава падзялілася вопытам маральна-патрыятычнага выхавання навучэнцаў.

Цэнтр творчасці дзяцей і моладзі з’яўляецца
базавай установай для развіцця дзіцячых талентаў. Яго педагогі ведаюць, як
абудзіць у маленькім чалавечку цягу да прыгожага, зацікавіць, захапіць,
дапамагчы рэалізавацца. Пра тое, якім чынам раскрываюцца творчыя здольнасці
навучэнцаў расказала дырэктар ЦТДіМ Наталля Пракопчык.

Удзельнікі канферэнцыі пазнаёміліся з вопытам
работы летняга кругласутачнага профільнага лагера “Інтэлектуал”, у
якім нашы школьнікі паралельна з аздараўленнем рыхтаваліся да ўдзелу ў
алімпіядах па вучэбных прадметах. Працаваў ён на базе ДУА “Лапіцкая
школа”. Слайд-шоу дапамагло гледачам наглядна пераканацца ў тым, што лагер
працаваў плённа, дзецям было цікава.

Вельмі прыемна, што педагагічныя калектывы
ўстаноў адукацыі атрымалі папаўненне. 20 маладых спецыялістаў з першага верасня
прыступаюць да работы. Сярод іх — настаўнікі пачатковых класаў, замежных моў,
гісторыі, фізкультуры, матэматыкі, педагог-псіхолаг, кіраўнік гурткоў… Усе
маладыя і натхнёныя, поўныя ідэй і планаў. Прагучалі наказы ад больш вопытных
калег, пажаданні і словы падтрымкі ў самай складанай і адказнай на свеце справе
— выхаванні дастойных грамадзян і вартых павагі асоб.

Іна Заскевіч.