Дашкольная ўстанова з паэтычнай назвай
“Крынічка” ў нашым горадзе знаёмая многім. Шмат творчых людзей, у
раннім узросце “наталіўшы з яе смагу”, развілі свой прыродны талент і
зараз сталі цікавымі, артыстычнымі асобамі. У чым яшчэ раз пераканаліся госці
свята, прысвечанага 25-гадоваму юбілею ясляў-сада № 9.

Павіншаваць калектыў установы прыйшлі начальнік
аддзела адукацыі Наталля Шаўчэнка, старшыня райарганізацыі прафсаюза работнікаў
адукацыі і навукі Алена Кулакоўская і другія. Было сказана багата цёплых слоў,
адзначаны неацэнны ўклад у выхаванне дашкольнікаў, высокія рэйтынгавыя
паказчыкі. Загадчыца “Крынічкі” Галіна Стэльмашонак, якая аддала
ўстанове чвэрць стагоддзя, па праву атрымала Ганаровую грамату ўпраўлення
адукацыі Магілёўскага аблвыканкама. “Няма больш адказнай дзейнасці, чым
работа педагога, — адзначыла Наталля Шаўчэнка пры ўручэнні ўзнагароды. — Бацькі
могуць ганарыцца тым, што іх дзеці наведваюць менавіта “Крынічку”.
Кожны дзень, праве-дзены тут, дарыць малым радасць і шчасце”. А Алена
Кулакоў-ская выказала ўпэўненасць, што асноўныя дасягненні сада — яшчэ
наперадзе.

Дашкольная ўстанова атрымала ў падарунак ад
ад-дзела адукацыі новае фізкультурнае абсталяванне і пасцельныя камплекты для
сваіх выхаванцаў, праца самых творчых і старанных работнікаў была адзначана
граматамі аддзела адукацыі, райкама прафсаюзаў, установы адукацыі.

Выступіла Людміла Раманава — першая загадчыца
ясляў-сада, які ў той час з’яўляўся структурным падраздзяленнем завода
аўтамабільных агрэгатаў. Яна выказала свае пачуцці да дружнага моцнага
калектыву, пажадала далейшага росквіту яго прафесійнага патэнцыялу, падарыла
камплект наглядных дапаможнікаў па развіццю мовы. Віншавалі юбіляраў калегі і з
іншых дашкольных устаноў.

А далей педкалектыў прадэманстраваў сваё
майстэрства і на справе даказаў, што тут бяздарныя не працуюць, выхавальнік
умее ўсё: пець і танцаваць, складаць вершы і вырабляць шэдэўры з нічога, рабіць
пародыі і чытаць рэп, варыць кашу з сякеры і пераўтварацца ў любога
літаратурнага персанажа.

Кожны з удзельнікаў і гасцей свята
“ўзнагароджваўся” памятнай стужкай “лаўрэата” ў розных
намінацыях.

З замілаваннем глядзелі прысутныя на выступаючых
дзяцей. Прычым, не толькі цяперашніх выхаванцаў, але і былых, якія ўжо даўно
развіталіся з дзяцінствам, але не з дзіцячым садам. Яны па-ранейшаму
падтрымліваюць сувязі са сваімі былымі выхавальнікамі, наведваюць родныя
“пенаты”. Многія з выпускнікоў сталі лаўрэатамі розных конкурсаў не
толькі ў межах рэспублікі, але і міжнародных, і палымянымі танцамі і спевамі
парадавалі сваіх першых настаўнікаў.

Выступалі і бацькі, якія з удзячнасцю адзначалі,
што дадзенай дашкольнай установе ўласцівы цяпло і дамашняя ўтульнасць, таму
дарослыя пакідаюць на дзень свой “скарб” тут без асаблівага
хвалявання. І гэта, бадай, галоўная адзнака працы нашай “Крынічкі”.

Іна Заскевіч.