За інтэлектуальнымі гульнямі даўно замацаваўся
стэ-рэатып: статычнае мерапрыемства, дзе збіраюцца вельмі разумныя людзі і
бесперастанку адказваюць на надта складаныя пытанні. Насамрэч спаборніцтвы
эрудытаў зусім іншыя: разнастайныя, азартныя і захапляльныя. Што яшчэ раз
пацвердзіў праведзены нядаўна ХІІ адкрыты абласны турнір “Кубак дружбы”.

Ад Асіповічаў у Магілёў ездзіла каманда
“Нечаканы паварот” гуртка ЦТДіМ. Перад землякамі стаяла нялёгкая задача —
пазмагацца з 39 сапернікамі з 9 гарадоў.

На працягу двух дзён старшакласнікі спаборнічалі
ў 4 конкурсах. У літаратурнай гульні “Слова героям” удзельнікі мусілі не толькі
здагадацца, з якога твора прыводзіцца цытата, але і ўставіць у яе прапушчаныя
словы. У час “Што? Дзе? Калі?” кожная каманда на працягу 15 хвілін давала
адказы на 48 пытанняў. Нечаканым і няпростым выпрабаваннем стала “Музычная
шкатулка”: абапіраючыся на сваё музычнае “чуццё” і логіку, трэба было суаднесці
прадстаўленыя карцінкі з пэўнымі мелодыямі. Асіпаўчане заваявалі ў гэтым
конкурсе Дыплом ІІІ ступені, а яшчэ адзін добры вынік прынёс “Брэйн-рынг”.
Землякі занялі пачэснае VI месца, абагнаўшы ўдзельнікаў аднайменнай
тэлевізійнай перадачы.

Вольга ЖАРНАСЕК.