— Канстанцін Эдгаравіч Мацюненка нарадзіўся педагогам-мастаком, — так лічыць метадыст раённага Цэнтра творчасці дзяцей і моладзі Ліна Бахарава. — I сам з сям’і мастака, інжынера па эстэтыцы Эдгара Якаўлевіча Кагана і настаўніцы малявання і чарчэння Святланы Пятроўны Мацюненка.

— Сястра — таксама мастачка, зараз працуе дызайнерам, — дадае ён. — Мастаком была і цётка. Нядзіўна, што і жонку выбраў з мастацкага асяроддзя. А сам да малявання, хоць і прызвычаіўся з дзяцінства, але адчуў сябе мастаком толькі падчас вучобы ў інстытуце.

Як любы творчы чалавек, Мацюненка знаходзіцца ў пастаянных пошуках новых стыляў, метадаў, відаў дзейнасці. 4 гады працаваў мастаком газеты «Знамя юности», выкладаў маляванне ў розных навучальных установах нашага раёна. Зацікавіўся камп’ютарным дызайнам, асвоіў і цяпер нават ездзіць у абласны інстытут развіцця адукацыі выкладаць вектарную камп’ютарную графіку для настаўнікаў інфарматыкі.

Чацвёрты год працуе Канстанцін Эдгаравіч мастацкім кіраўніком дзіцячага аб’яднання па інтарэсах «Выяўленчая творчасць» ЦТДіМ.

— Уменне маляваць — гэта яшчэ не ўсё, — разважае ён. — Неабходна вывучыць тэхнікі, развіць уменне фантазіраваць, шукаць штосьці сваё. Розныя матывы прыводзяць дзяцей у гурткі. Хтосьці — за кампанію з сябрам, кагосьці напраўляюць бацькі, іншыя — з цікавасці ці ад нуды. А застаюцца тады, калі ім цікава.

— Абаяльнаму, інтэлігентнаму ад прыроды, яму ўдаецца знайсці да-кладную, шчырую ноту ў зносінах з дзецьмі, — гаворыць метадыст, — умее запаліць іскрынку творчасці ў душах маленькіх мастакоў. Эрудзіраваны чалавек — і дзецям з ім цікава. А яшчэ не патрабуе, а стварае сітуацыю поспеху, што спрыяе справе. Нездарма ж яго вучаніца Насця Дзергалёва заняла II месца ў абласным конкурсе плакатаў і малюнкаў «Небяспечнасць — СНІД», а Сангіта Лал — аналагічнае ў абласным конкурсе «Тэхна-інтэлект» і III на рэспубліцы ў намінацыі «Жывапіс». Дзяўчынка падрыхтавала эцюд горада, што стала знакавым: у хуткім часе яна паступіла ў індустрыяльна-педагагічны каледж на спецыяльнасць «прамыслова-грамадзянская будоўля».

У апошнія дні студзеня ў абласным Цэнтры творчасці прайшоў конкурс «Педагог дадатковай адукацыі». Працаўнікі нашага Цэнтра традыцыйна прымаюць у ім удзел і выходзяць у суперфінал. У мінулым годзе Ганна Дудко стала «срэбраным» прызёрам, на гэты раз Канстанцін Мацюненка атрымаў абсалютную перамогу.

— Для нас гэта не проста радасная падзея, — дзеліцца ўражаннямі Ліна Сямёнаўна. — Летась метадычная служба заняла першае месца на конкурсе такога ж узроўню, і дасягненне Канстанціна Эдгаравіча ў чарговы раз пацвердзіла эфектыўнасць работы ўстановы.

Няпроста далася перамога. Неабходна было прадставіць уласны метадычны прадукт, абараніць метадычны комплекс, правесці адкрыты ўрок і майстар-клас, самапрэзентацыю, прайсці педагагічнае тэсціраванне. I педагогу ўдалося раскрыць усе грані свайго таленту.

— Актыўную дапамогу аказала творчая група, у склад якой уваходзілі адміністрацыя, метадыст, педагогі аддзела тэатральна-мастацкай і тэхніч-най творчасці, дзеці. Дарэчы, навучэнцы ўдзельнічалі і ў візітоўцы, — сведчыць мастак.

Акрамя выкладчыцкай дзейнасці, Канстанцін піша карціны, якія не раз вы-стаўляліся. Магіляўчане, асіпаўчане, нават масквічы неаднакратна маглі наведаць выставу твораў нашага таленавітага земляка. Тры гады таму была аргані-завана персанальная вы-става ў Асіповіцкім гісторыка-краязнаўчым музеі, а многія карціны ўпрыгожваюць дамы яго сваякоў і сяброў.

Творчасць для мастака — спосаб самарэалізацыі, і зносіны з дзецьмі, лічыць ён, садзейнічаюць гэтаму працэсу. I марыць, каб вучні перасягнулі ў майстэрстве свайго настаўніка.

Iна ЗаскевIч.