Пра тое, што хутка 1 верасня
— пачатак новага навучальнага года, нагадвае мноства фактараў. Але, бадай, самы
галоўны — адкрыццё па ўсёй рэспубліцы школьных базараў. Гандлёвыя прадпрыемствы
Асіповіччыны з сярэдзіны ліпеня таксама распачалі продаж вучнёўскіх рэчаў.

Як паведаміў рэдакцыі
“раёнкі” намеснік дырэктара ААТ “Гандаль” Міхаіл Ніканчык, ужо ў маі-чэрвені ў
магазіны пачалі паступаць тавары для школьнікаў, такім чынам ствараліся
неабходныя запасы, каб у перыяд актыўнай рэалізацыі на прылаўках быў адпаведны
асартымент.

— Мы імкнемся да таго, каб
пакупнік мог атаварыцца менавіта ў родным горадзе, не выязджаючы за яго межы, —
гаворыць Міхаіл Мікалаевіч. — Зразумела, што ў сталіцы выбар значна большы, не
спадабалася ў ЦУМе, можна праехаць у ГУМ або ў іншыя папулярныя магазіны. Да
паслуг жа асіпаўчан гандлёвыя кропкі нашага тава- рыства прапаноўваюць адзенне
і абутак для хлопчыкаў і дзяўчынак розных беларускіх вытворцаў па цане ад
эканом- да прэміум-класа. Прадугледжаны нават гандлёвыя зніжкі. Напрыклад,
абутак фабрыкі “ШагоВита” можна набыць на 5% танней, чым у магазінах іншых
гандлёвых арганізацый. Трыкатажная фабрыка “Палессе” прадаставіла зніжкі на
сваю прадукцыю ў памеры ад 5 да 52%. Калі ж якіх-небудзь тавараў на прылаўку
няма, пакупнікі могуць пакінуць заяўку на неабходны тавар і праз некаторы час
прыйсці за ім. Гандлюем школьным таварам не толькі ў магазінах, але і на рынку.

Каб ацаніць асартымент
тавараў, даведацца пра думкі пакупнікоў аб якасці тавараў для вучняў,
карэспандэнт “АК” пабывала ў магазіне № 24, дзе прадстаўлены тавары для вучняў.
На кранштэйнах акуратна размясціліся касцюмы, сарочкі, блузкі, спадніцы, на
стэлажах — абутак, а таксама рукзакі і канцтавары. У пасляабедзенны час пакупнікоў
было не асабліва многа.

— Актыўны гандаль пачынаецца
пасля пяці гадзін вечара, калі бацькі вяртаюцца з работы, і па выхадных днях, —
гаворыць загадчыца магазіна Таццяна Дзмітрачэнка. — З набліжэннем школьнага
сезона тавараабарот вырас прыблізна ў 2 разы. Кошт на адзенне новага завозу,
асабліва на хлапчуковыя касцюмы, дасягае трохсот тысяч, хаця камплекты
мінулагодніх мадэляў можна было купіць і танней. Так, дзявочы сарафан каштаваў
усяго 17.500 рублёў.

Падыходжу да пакупнікоў,
цікаўлюся, ці задавальняе іх асартымент і цана тавараў, якія яны збіраюцца
набыць?

— Безумоўна. Сёння прыйшлі,
каб купіць трыкатажныя вырабы, — гаворыць мама двух дзяцей Алена Аляксандраўна.
— Астатняе ўсё ўжо набылі. Сына-друга-класніка цалкам апранулі ў гэтым
магазіне, ды і другое дзіця, якое наведвае садок, таксама прыбралі тут. У
прыватных магазінах ды на рынку амаль усё кітайскае, як вядома, такі тавар
якасцю не адрозніваецца. Абутак жа, наадварот, там таннейшы. Адхадзіў адзін
сезон — і не шкада выкінуць. Пастаралі-ся закупіцца раней, каб потым не бегаць
і не стаяць у чэргах. Ды і цэны павышаюцца пастаянна.

Каб падтрымаць сем’і
маламаёмных грамадзян, была прынята пастанова Савета Міністраў, згодна з якой
яны могуць атрымаць льготны крэдыт на пакупку школьных рэчаў пад 10% тэрмінам
на 3 гады. Дзейнічае ён з 7 жніўня па 1 кастрычніка.

— З мэтай яго атрымання
патрэбна прыйсці ў мясцовае аддзяленне ААБ “Беларусбанк”, прынесці даведку аб
заробку на сябе і на паручыцеля, а таксама рахунак-фактуру, у якім будуць
пералічаны найменні тавараў айчыннай вытворчасці школьнага асартыменту, —
гаворыць начальнік крэдытнага аддзела ўстановы Наталья Асадчая. — Толькі пасля
гэтага на магазін па безнаяўнаму разліку будуць пералічаны грошы. Пасля
атрымання тавару крэдытаатрымальнік павінен прынесці ў банк накладную, каб
пацвердзіць мэтавае выкарыстанне грошай. Менавіта гэтая працэдура і выклікае
незадавальненне ў кліентаў, таму да гэтай пары ніхто не выказаў жаданне
скарыстацца крэдытам.

Ніна ВІКТОРЧЫК.