Гiмназія мае больш высокі статус чым звычайная
школа — на III ступені навучання асобныя прадметы вывучаюцца па накірунках на
павышаным узроўні, у дадатак да базавых ведаў навучэнцу даецца магчымасць больш
цікавага, шматбаковага, універсальнага развіцця.

Мы ганарымся, што ўстанова адзіная ў вобласці
беларускамоўная, і добра разумеем, што дзяцей і надалей трэба далучаць да
нацыянальнай культуры, прывіваць ім любоў да роднай мовы.

Місія гімназіі — стварэнне ўмоў для нацыянальнай
эліты краіны; асноўная мэта, над якой працуем, — фарміраванне ўсебакова
развітай асобы, здольнай рэалізаваць свой інтэлектуальны і творчы патэнцыял у
дынамічных сацыяльна-эканамічных умовах. Маем уласную сімволіку, гімн,
традыцыі. Сярод іх — дзень гімназіі, прысвячэнне ў гімназісты, дзень
самакіравання, свята талентаў, дні навук.

“Калі быць — то быць лепшымі” — перакананы
педагагічны калектыў. За час існавання гімназіі, гісторыя якой пачынаецца з
1994 года, калектыў даў пуцёўку ў жыццё 766 юнакам і дзяўчатам, у ліку якіх 94
медалісты: 63 — залатыя, 31 сярэбраны. Радуе і тое, што ўсе нашы выпускнікі
паступаюць у вышэйшыя і сярэдне-спецыяльныя навучальныя ўстановы.

Прыярытэтныя накірункі дзейнасці гімназіі —
павышэнне якасці адукацыі праз работу з адоранымі і высокаматываванымі вучнямі
і ўзроўню выхаванасці праз актывізацыю работы органаў самакіравання, рэалізацыя
здароўезберагаючых тэхналогій, грамадзянска-патрыятычнае выхаванне.

Для развіцця інтэлектуальных і творчых
здольнасцей вучняў у нас паспяхова працуе навукова-даследчае таварыства
старшакласнікаў “Пошук”, на I ступені навучання — навуковае таварыства
“Прыступка ў будучыню”. Навучэнцы прымаюць актыўны ўдзел у раённых і
рэспубліканскіх — Мележаўскія чытанні ў г. Гомелі, Міжнародная
навукова-даследчая канферэнцыя ў г. Калінкавічы — конкурсах навукова-даследчых
работ. У гонар гімназістаў — пераможцаў міжнароднага конкурсу
навукова-даследчых работ па матэматыцы Максіма Сінькевіча і Яўгена Яўсеенкі —
названы малыя планеты, адкрытыя ў 2005 годзе ў лабараторыі імя Лінкальна ў
Кліўлендзе.

На базе ўстановы працуе рэсурсны цэнтр па тэме:
“Сістэма работы па арганізацыі факультатыўных заняткаў як сродак і асноўная
ўмова задавальнення агульнаадукацыйных запытаў і пазнавальных інтарэсаў
вучняў”, раённы цэнтр па рабоце з таленавітымі вучнямі. Сябруюць таксама
гімназісты і са спортам, актыўна прапагандуюць здаровы лад жыцця.

Высокія паказчыкі навучэнцаў — вялікая заслуга
педагагічнага калектыву. Сёння адукацыйны працэс ажыццяўляюць 73 настаўнікі,
82% з якіх маюць вышэйшую і I кваліфікацыйную катэгорыі. Двойчы нашы педагогі —
С.В.Дзюбенка ў 2003 і Т.Л.Амбрушкевіч у 2006 годзе — станавіліся Настаўнікамі
года Магілёўскай вобласці.

 Прафесійнае развіццё настаўніка немагчыма без
стварэння каманды аднадумцаў — і мы працуем толькі ў садружнасці.

Словам, навучанне ў гімназіі арыентавана на
выяўленне інтарэсаў і здольнасцей вучня, развіццё яго патэнцыялу. Менавіта тут
кожны можа праявіць свае інтарэсы да навукі, любому баку ведаў. I нашы дзверы
адчынены для ўсіх, хто жадае знайсці верных сяброў і таленавітых настаўнікаў.

Святлана МАМСIКАВА,

дырэктар ДУА “Гімназія г. Асіповічы”.