Свята апошняга званка заўсёды спалучае ў сабе і радасць, і светлую
самоту. Апошняе, канечне, тычыцца выпускнікоў. Яно і зразумела: юнакі і
дзяўчаты развітваюцца ў гэты дзень са школай і дзяцінствам.

Сёлета на Асіповіччыне апошні званок праспяваў
сваю развітальную мелодыю для 248 гарадскіх і 166 сельскіх вучняў 11 класаў.
Пры паспяховай здачы школьных экзаменаў 19 з іх маюць магчымасць атрымаць за
сваю выдатную вучобу залатыя і сярэбраныя медалі. Поспехаў усім на іспытах!

Ёсць нагода радавацца ўжо зараз астатняй
дзетвары: наперадзе самыя доўгія і любімыя канікулы. За лета можна добра
адпачыць, тым больш, што для гэтага створана шмат умоў: заўтра пачнуць работу
школьныя і кругласутачныя аздараўленчыя лагеры, сваіх наведвальнікаў заўсёды
чакаюць бібліятэкі, спартыўныя залы і г.д. Ну а ў першы дзень верасня,
засумаваўшы за лета па школьных сябрах і настаўніках, уроках і перапынках, з
новымі сіламі прыемна будзе зноў сесці за парты.