Пад такой назвай у гімназіі прайшла нядаўна
чарговая раённая навукова-практычная канферэнцыя. У ёй прымалі ўдзел вучні школ
Асіповіччыны, якія вывучаюць гісторыю роднага краю і актыўна вядуць пошукавую
работу па аднаўленні імён загінуўшых у гады Вялікай Айчыннай, займаюцца разам з
дарослымі ваенна-гістарычнай рэканструкцыяй, шмат падарожнічаюць, каб больш
дасканала ведаць жыццё людзей, што насяляюць нашу зямлю.

Па словах дырэктара раённага цэнтра турызму і
краязнаўства Святланы Барысевіч, педагогі дашкольнай адукацыі вядуць значную
работу па выхаванні ў падлеткаў пачуцця патрыятызму. Праводзячы экспедыцыі,
вучні збіраюць шмат цікавых і карысных звестак, якія бяруцца за аснову пры
напісанні навукова-даследчых работ. З імі ўдзельнічаюць у розных абласных і
рэспубліканскіх конкурсах, якія праходзяць у рамках акцыі “Жыву ў Беларусі — і
тым ганаруся”.

Перад пачаткам работы канферэнцыі ў фае была
арганізавана выстава значкоў вядомага ў горадзе калекцыянера Валерыя Чупахіна,
які не толькі прадэманстраваў дзецям вынік свайго захаплення, але і адказаў на
шматлікія пытанні. Прычым некаторыя з іх самі з задавальненнем займаюцца
збіральніцтвам.

“Жыве сабе чалавек на-дзённымі клопатамі,
хвалюецца за дзень заўтрашні, звыкла глядзіць на добра знаёмыя краявіды і не
здагадваецца пра тое, што даўным-даўно ў гэтых мясцінах…”, — гучаць словы
вядучай. На сцэну падымаюцца вучні Ілья Папоў з СШ № 4, Таццяна Баравікова і
Вольга Карашкова з Ясенскага і Ліпенскага ВПК д/с-СШ, якія знаёмяць прысутных з
работамі “Летапіс г. Асіповічы” і “Гісторыя ст. Ясень і в. Ліпень” (кіраўнікі
Алена Анціховіч, Леанід Бязручка і Вольга Падвойская). У справаздачах аб
праведзенай пошукавай дзейнасці рабяты выклалі багата новай інфармацыі аб
даследуемых мясцінах. Прэзентацыя кожнага з іх змя-шчала паданні аб паходжанні
назваў, дакументы і фотаздымкі людзей, якія мелі дачыненне да апісваемых
падзей.

Пра знойдзеныя дакументы 214-й
паветрана-дэсантнай брыгады і іх перадачу ў Асіповіцкі гісторыка-краязнаўчы
музей можна было даведацца з даклада, які падрыхтаваў мясцовы краязнаўца
Дзмітрый Саўрыцкі. Сугучна з яго работай прайшла дэманстрацыя ваеннага
абмундзіравання 1941 года, над рэканструкцыяй якога працаваў педагог дадатковай
адукацыі Андрэй Торбін. Яго выхаванцы Радзівон Пішкоў, Аляксей Марозаў, Павел
Савін і Аляксей Дзенісевіч выступілі ў ролі маладых байцоў Чырвонай Арміі.

Адзінаццацікласніца з СШ № 3 Анастасія Дзяргач
разам з педагогам Клаўдзіяй Жаўрыд спынілі ўвагу на даследаванні “Іх імёны не
будуць забыты”.

Не абмінулі школьнікі і тэму “Дзеці і вайна”. Яе
раскрывалі вучні з СШ № 2, № 4, Вяззя і Татаркі Аляксандр Рудкевіч, Юлія
Сугака, Дзмітрый Прашковіч, Уладзіслаў Званскі пад кіраўніцтвам педагогаў
Андрэя Лянчэўскага, Таццяны Лёлінай, Ніны Лапікавай і Віталія Лагуціна.

Анастасія Пруднікава і Алег Торапаў пад
кіраўніцтвам выкладчыка Юрыя Сцяпанава падрыхтавалі даследаванне “Вызваленне
Асіповіцкага раёна. 1-ы Данскі корпус”. А Крысціна Зык і Ганна Ванюкова з
Дараганаўскага ВПК д/с-СШ прэзентавалі матэрыял, які адлюстроўваў асноўныя
напрамкі дзейнасці гуртка “Дараганазнаўства”, што займаецца ўстанаўленнем імён
загінуўшых у гады вайны, вядзе іншую даследчую работу.

Падчас мерапрыемства гучалі вершы і песні пра
нашу краіну і родныя мясціны, пра гераізм салдат той вайны, якія падрыхтавалі
выхаванцы ансамбля “Музычны ваяж” пад кіраўніцтвам Наталлі Грэнь. А фіналам
канферэнцыі стала ўзнагароджванне ўдзельнікаў Дыпломамі і памятнымі прызамі.