Канферэнцыю адкрыў старшыня райвыканкама Андрэй Дубінчык. Ён звярнуўся да педагогаў з добрымі, шчырымі пажаданнямі і ўручыў узнагароды. Намеснік дырэктара па вучэбнай рабоце СШ № 3 Таццяна Татур атрымала Ганаровую грамату Міністэрства адукацыі Рэспублікі Беларусь. 12 настаўнікаў удастоены грамат профільнага Міністэрства, а праца настаўніка матэматыкі СШ № 4 Алены Мурашка адзначана Падзякай Магілёўскага аблвыканкама.

Важнай часткай мерапрыемства стала ўшанаванне кіраўнікоў, якія ідуць на заслужаны адпачынак. Словы падзякі сёлета гучалі ў адрас метадыста раённага вучэбна-метадычнага кабінета Людмілы Кадзет і загадчыка дзіцячага сада № 6 “Сонейка” Алены Ясакавай. Людміла Фёдараўна прысвяціла сістэме адукацыі ўсё жыццё. У яе працоўнай кніжцы толькі тры ключавыя пасады: настаўнік матэматыкі Крамокскай сярэдняй школы, інспектар асіповіцкага РАНА і метадыст раённага вучэбна-метадычнага кабінета. Узнагароджана нагрудным знакам Міністэрства адукацыі Рэспублікі Беларусь «Выдатнік адукацыі». Не менш пачэсны працоўны шлях і ў Алены Іванаўны. Яна ўзначальвала ўстанову на працягу 16 гадоў. Дзякуючы намаганням і прафесіяналізму калектыву і кіраўніка, дзіцячы сад № 6 з 2022 года з’яўляецца рэспубліканскай інавацыйнай пляцоўкай па тэме “Укараненне сеткавай мадэлі фарміравання грамадзянска-патрыятычнай пазіцыі навучэнцаў: рэгіянальная мадэль”.

Каб дасягнуць найвышэйшых вынікаў у педагагічнай дзейнасці, неабходны пастаяннае павышэнне прафесійнага ўзроўню, самаадукацыя, знаёмства з вопытам калег. На сёлетняй канферэнцыі агучваліся лепшыя напрацоўкі ў важнай справе фарміравання пачуцця патрыятызму ў падрастаючага пакалення.

Загадчык аддзела па адукацыі райвыканкама Ірына Сяргейчык (злева) прааналізавала дзейнасць аддзела і ўстаноў раёна, намеціла задачы, якія неабходна вырашыць, а таксама ўзнагародзіла семярых педагогаў Ганаровымі граматамі галоўнага ўпраўлення па адукацыі Магілёўскага аблвыканкама за шматгадовую і добрасумленную працу. Сярод іх і настаўнік англійскай мовы СШ № 2 Людміла Цвірко.

Уручалі ўзнагароды і ад райкама прафсаюза работнікаў адукацыі

і навукі. Ганаровую грамату з рук старшыні аб’яднання Марыны Гірэнка (злева) атрымалі кіраўнікі фізічнага выхавання, старшыні першасных прафсаюзных арганізацый дзіцячых садоў № 1 «Журавінка»

і № 6 «Сонейка» Галіна Герасімовіч і Інеса Круціліна, а таксама Таццяна Чэпік. Падзякі райкама профільнага прафсаюза папоўнілі скарбонку старшыні пярвічкі СШ № 4, настаўніка біялогіі Вольгі Клімовіч (справа) і кіраўніка фізічнага выхавання, члена прафкама Асіповіцкага дашкольнага цэнтра развіцця дзіцяці Паліны Міруковай.

Прысутным таксама прадставілі і зноў прызначаных упраўленцаў. Так, намеснікам дырэктара па вучэбнай рабоце СШ № 5 стала настаўнік пачатковых класаў СШ № 1 Ірына Анісава. Дар’я Мінава змяніла пасаду намесніка дырэктара па вучэбнай рабоце СШ № 4 на партфель галоўнага спецыяліста аддзела па адукацыі райвыканкама, а дырэктар Осаўскай базавай школы Таццяна Чэпік стала метадыстам раённага вучэбна-метадычнага кабінета.