10 тысяч трохлітровых слоікаў “Агуркоў марынаваных беларускіх” ужо сышло ў гэтым сезоне з канвеера ААТ “Асіповіцкі кансервавы завод”. Яшчэ 15 тон агуркоў чакаюць сваёй чаргі. Закупляецца гэтая зялёная прадукцыя ў мясцовым райста, а таксама ў фермерскіх гаспадарках Брэсцкай вобласці.

270 чалавек праходзяць аздараўленне ў дзіцячым санаторыі “Свіслач”, на базе якога размясціўся і спартыўны аздараўленчы лагер, дзе адпачывае 25 юных гімнастак. У суправаджэнні бацькоў папраўляюць здароўе 36 дзяцей-інвалідаў.

У райспажыўтаварыстве — разгар нарыхтовак. Прадпрыемства ўжо прыняло ад насельніцтва амаль 40,2 тоны чарніц, каля 300 кілаграмаў чырвоных і чорных парэчак, 47,4 тоны агуркоў, прыкладна 26 тон капусты, 2,8 — морквы, 3,5 — чырвоных буракоў. За здадзеную прадукцыю насельніцтва атрымала ўжо больш за мільярд рублёў.

У раёне дзейнічае 27 аграэкасядзіб, большасць якіх зараз рыхтуецца да ўдзелу ў абласным этапе рэспубліканскага конкурсу “Лепшая аграэкасядзіба”, вынікі якога будуць падведзены ў жніўні. Спаборніцтва пройдзе па пяці намінацыях: “Лепшы старт”, “Беларуская традыцыйная кухня”, “Этнакомплекс”, “Экасядзіба”, “Стыль і гармонія”. Дарэчы, летась у апошняй намінацыі стала пераможцай гаспадыня аграэкасядзібы “Свіслач” Марыя Пішчык.

У лабараторыі мясцовага рынку за студзень-чэрвень зроблена 3.525 экспертыз расліннай, 240 — малочнай, 187 — мясной, 3.837 — іншай сельскагаспадарчай прадукцыі, сярод якіх — яйцо і мёд. Радыелагічных даследаванняў было праведзена 258.

У Карытненскім сельсавеце сёлета праведзена 6 пасяджэнняў савета грамадскага пункта аховы правапарадку, на якія запрашаўся 31 чалавек. У адносінах 16 асоб прынята рашэнне пра іх працаўладкаванне. Разгледжана 17 матэрыялаў, у тым ліку 4 тычацца грамадзян, схільных да здзяйснення правапарушэнняў і злачынстваў; 12 — да тых, хто злоўжывае алкаголем. Працаўладкаваны 21 непрацуючы грамадзянін.