Цёплым, эмацыянальным, патрыятычным атрымалася сённяшняе падвядзенне вынікаў у штогадовым спаборніцтве па сацыяльна-эканамічным развіцці Асіповіцкага раёна. Па-кароткаму — злёт перадавікоў. Былі адзначаны лепшыя ў сваіх сферах у 2023 годзе літаральна па ўсіх напрамках. Адметнасцю сённяшняга свята — а інакш гэта мерапрыемства і не назавеш — стала і значная колькасць гасцей. Завіталі ў Асіповічы прадстаўнікі Савета Рэспублікі Нацыянальнага сходу Рэспублікі Беларусь — намеснік старшыні пастаяннай камісіі па адукацыі, навуцы і сацыяльным развіцці Алег Дзячэнка, аблвыканкама — старшыня камітэта па сельскай гаспадарцы і харчаванні Анатолій Ланкуць, галаўных прадпрыемстваў — генеральны дырэктар ААТ “Бабушкина крынка” Эдуард Арэшка, намеснік гендырэктара РУП “Магілёўаблгаз” Аляксандр Прафацілаў, кіраўніцтва Пухавіцкага і Бярэзінскага раёнаў Мінскай вобласці, дэлегацыя з Бранска Расійскай Федэрацыі, пра якую “АК” сёння ўжо расказваў у сваім тэлеграм-канале. Ну і, зразумела, кіраўнікі прадпрыемстваў і арганізацый раёна, прадстаўнікі працоўных калектываў, грамадскіх аб’яднанняў, моладзь, ветэраны працы.

Першым віншаваў асіпаўчан старшыня райвыканкама Канстанцін Жыгуцкі. Ён адзначыў, што дасягнутыя высокія рэзультаты — вынік складанай і напружанай працы моцных духам, мэтанакіраваных людзей. Тых, хто можа пераадольваць любыя цяжкасці і паспяхова рэалізоўваць пастаўленыя задачы. Кіраўнік раёна акцэнтаваў увагу, што нас чакаюць важныя падзеі: 100-годдзе заснавання Асіповіцкага раёна, 80-годдзе вызвалення Беларусі ад нямецка-фашысцкіх захопнікаў. Канстанцін Аляксандравіч падзякаваў усім за шчырую працу. У Год якасці асноўная мэта сацыяльна-эканамічнага развіцця раёна — павышэнне эфектыўнасці работы эканомікі і паляпшэнне на гэтай аснове якасці і ўзроўню жыцця насельніцтва.

Прыемным момантам стала ўзнагароджанне Асіповіцкага раёна РУП “Магілёўаблгаз”: прадпрыемства ўпершыню праводзіла конкурс на лепшы рэгіён па рабоце з газавымі службамі. І гэтым рэгіёнам у Прыдняпроўскім краі стала Асіповіччына.
Што характэрна: усе госці, што выступалі на сцэне, сышліся ў адным меркаванні: асіпаўчанам можна толькі па-добраму зайздросціць. І ў гэтым ёсць рацыя: наш край сапраўды цудоўны і камфортны для жыцця.

Не будзем пералічваць усіх, хто атрымаў узнагароды, — гэта “АК” ужо зрабіў у сённяшнім тэматычным нумары, а проста ад душы павіншуем землякоў. Асаблівай падзякі заслугоўваюць і арганізатары свята: добры настрой ужо чакаў запрошаных на ўрачыстасць у фае “Равесніка” — тут былі наладжаны майстар-класы, дэгустацыі нашых перапрацоўчых прадпрыемстваў, працавалі выставы карцін і прадметаў дэкаратыўна-прыкладнога мастацтва, гучала жывая музыка, а потым ужо на сцэне было прадстаўлена шмат новых яркіх, крэатыўных нумароў. Словам, атрымалася сапраўднае шоу, якое стала таксама своеасаблівым падарункам усім, хто прысутнічаў на мерапрыемстве.

Больш фота глядзіце ў нашым тэлеграм-канале.