Тры навагоднія ёлкі ўстаноўлены ў райцэнтры працаўнікамі УКП ЖКГ: 12-метровыя — у парках на абодвух баках горада, 5-метровая — на пасёлку Савецкі.

5,5 тысячы абанементаў АВЭС “Белтэлекам” пераведзена ў Асіповічах на оптавалаконную сувязь. Зараз праца ідзе ў аўтазаводскім мікрараёне — тут 28 шматпавярховак, каля 2 тысяч кватэр, і да канца года кожная атрымае оптавалакно. Акрамя гэтых маштабных работ, у сувязі са зняццем каардынатнай станцыі адбываецца масавае пераключэнне нумароў тэлефонаў юрыдычных асоб і арганізацый.

91 тысячу тон салодкіх караняплодаў прыняў сёлетнім сезонам Асіповіцкі буракапрыёмны пункт Слуцкага цукроварафінаднага камбіната. Сельгаспрадпрыемствамі раёна разам з фермерскай гаспадаркай “АграАўтаНова” здадзена 22782 тоны цукровых буракоў.

320% да адпаведнага леташняга перыяду складае аб’ём вытворчасці прадукцыі за студзень-лістапад на Асіповіцкім вытворчым участку ААТ “Бабруйскі КХП”. За гэты час тут выпушчана 32042 тоны мукі, 15927 — круп, у тым ліку 9868 — аўсяных.

“З любоўю да цябе, Беларусь” — пад такой назвай пройдзе ў Магілёве 10 снежня святочнае мерапрыемства, прысвечанае завяршэнню Года культуры. Ад Асіповіччыны ў ім прымуць удзел майстры па валянні з шэрсці, вышыўцы, ткацтве, народны ансамбль народнай песні і музыкі “Сузор’е” Пратасевіцкага і народны эстрадны ансамбль “Парадзіз” Ліпенскага СДК.

Зямельныя пытанні актыўна вырашаюцца ў Вяззеўскім сельвыканкаме. Сёлета сюды паступіла 138 заяў па афармленні праваўстанаўліваемых дакументаў, 58 — на пастаноўку на чаргу і прадастаўленне ўчасткаў для будаўніцтва і абслугоўвання жылых аднакватэрных дамоў. Для ўзвядзення жылля выдзелена  16 участкаў. 4,2 гектара неапрацоўваемых зямель падрыхтавана для перадачы ААТ “Авангард-Ніва”.

2146 індывідуальных домікаў для ўтрымання цялят было запланавана сёлета зрабіць у гаспадарках раёна — набліжаемся да яго выканання.

86,1 тысячы рублёў са сродкаў рэспубліканскага бюджэту асвоена з пачатку года ААТ ПМК-95 “Вадбуд” на тэхнічнае абслугоўванне аб’ектаў. Ад заілення ачышчана 14 кіламетраў каналаў, драўніннай расліннасці і кустоўя — 11 км, абкошана 343 км. Зараз распачнуцца работы па рэканструкцыі меліярацыйнай сістэмы Валчанка, якая знаходзіцца на мяжы нашага і Бабруйскага раёнаў.