Падчас веснавых канікул у 20 лагерах, арганізаваных пры ўсіх школах раёна, адпачываюць 262 хлопчыкі і дзяўчынкі. Рабяты маюць зносіны з аднагодкамі, 3-разовае харчаванне, цікава і карысна бавяць час.

Нарыхтоўка бярозавага соку завершана, паведамлі ў ДДЛГУ “Асіповіцкі доследны лясгас”. Вынік — 853 тоны коштам 147 тыс. рублёў. Асноўная частка ўраджаю рэалізавана перапрацоўшчыкам: амаль па 300 тон прададзена бабруйскай кампаніі “Аазіс Груп” і смалявіцкаму прадпрыемству “Вланпак”, 8 — мясцоваму кансерваваму заводу, 124 на суму 12 360 долараў ЗША экспартавана ў Літву. Адметна, што ў сезоне-2019 насельніцтвам было набыта 17 тон бярозавіку, сёлета — толькі 7,7.

У абласным этапе рэспубліканскага воднага конкурсу даследчых праектаў дыпломамі III ступені ўзнагароджаны навучэнец Лапіцкай школы Станіслаў Рудзько (кіраўнік Алёна Сцефанюк) і Аляксандра Жытнякоўская і Мікіта От (Святлана Жамкова) з СШ № 4.

Праз тэрмінал самаабслугоўвання для продажу квіткоў, усталяваны ў пачатку года ў будынку асіповіцкага чыгуначнага вакзала, прадаецца звыш 200 праязных дакументаў у суткі. Магчыма аплата карткамі, у тым ліку бескантактавымі, і наяўнымі грашыма: тэрмінал прымае купюры і манеты, выдае рэшту. Квіткі таксама можна набыць у касіраў або праз мабільны дадатак “БЧ. Мой цягнік”.

Народны хор ветэранаў працы, што працуе пры райцэнтры культуры і адпачынку, за ўдзел у рэгіянальным адборачным туры абласнога агляду-конкурсу калектываў мастацкай самадзейнасці ХV Рэспубліканскага фестывалю народнай творчасці ветэранскіх калектываў «Не стареют душой ветераны» атрымаў Дыпломы ІІ і І ступеней.

VI рэспубліканскі конкурс “Лідар энергаэфектыўнасці-2020”, які праводзіцца ў мэтах выяўлення і папулярызацыі лепшых энергаэфектыўных прадуктаў, сістэм і тэхналогій, пачаў прыём заявак да ўдзелу. Падрабязная інфармацыя — на афіцыйным сайце energokonkurs.by.

Сертыфікат аб праходжанні дзяржтэхагляду для атрымання дазволу на допуск транспартнага сродку да ўдзелу ў дарожным руху з 1 красавіка фізасобы прадстаўляць не абавязаны. Указам № 492, падпісаным 30 снежня 2019 года, уве-дзены новы пералік дакументаў, неабходных для правядзення дзяржтэхагляду і адміністрацыйнай працэдуры на допуск транспартнага сродку да ўдзелу ў дарожным руху: вадзіцелю не трэба прадстаўляць работніку дыягнастычнай станцыі талон да вадзіцельскага пасведчання, медыцынскую даведку аб стане здароўя і дазвол органа сувязі на права выкарыстання радыёчастотнага спектра пры эксплуатацыі радыёэлектронных сродкаў.

Гарадская лазня па   вул. Кастрычніцкай, 61 сёння змяняе графік работы: у сувязі з рамонтам жаночага аддзялення ў суботу з 9 да 22 гадзін тут чакаюць жанчын, у нядзелю ў той жа час — мужчын. Лазню на Вакзальнай, 36 (“чыгуначную”) па-ранейшаму можна наведаць з 13.00 да 19.00 (субота — жанчыны, нядзеля — мужчыны).

“Белтэлекам” нагадвае сваім кліентам пра магчымасць аддаленага абслугоўвання з выкарыстаннем  сэрвісу «Мой Белтэлекам» (my.beltelecom.by); сайтаў beltelecom.by, yasna.by, byfly.by, zala.by; па тэлефонах 123 (кругласутачна), 66-130, 29-502, 29-503, 29-504, 50-200 (аўторак-пятніца — з 9.00 да 18.00, субота — з 10.00 да 14.00); пытанне ці заяўку супрацоўнікам сэрвіснага цэнтра таксама можна накіраваць на электронную пошту ospmkt@mogilev.beltelecom.by.