Па выніках абласнога этапу рэспубліканскага конкурсу прафесійнага майстэрства “Настаўнік года” лаўрэатамі сталі настаўнікі хіміі СШ № 3 Людміла Мікуліч, англійскай мовы гімназіі Алеся Тамашук, выхавацель ясляў-сада № 10 “Расінка” Вольга Пятроўская.

За ўдзел у V Міжнародным конкурсе—фестывалі мастацтваў “Музыкі свет” вучаніца аб’яднання па інтарэсах “Вясёлыя ноткі” раённага цэнтра творчасці дзяцей і моладзі Соф’я Кандрацюк (педагог Марыя Гнядзько) атрымала званне лаўрэата III ступені ў намінацыі “Вакал”.

Рыбгас “Свіслач” зараз актыўна займаецца зарыбленнем. З зімовых сажалак у нагульныя ўжо пераведзена больш за 50 тон рыбы.

Райдзяржінспекцыя па насенняводстве, каранціне і ахове раслін раіць тым, хто набывае пладовыя, ягадныя, дэкаратыўныя культуры, патрабаваць у іх вытворцаў або прадаўцоў наяўнасць адпаведных дакументаў, якія пацвярджаюць сартавыя і пасяўныя якасці прадукцыі.

Адзіны дзень бяспекі дарожнага руху пад дэвізам “Пристегнись к безопасности!” праводзіць сёння Дзяржаўтаінспекцыя. Супрацоўнікі ДАІ засяродзяць увагу на выкарыстанні сродкаў пасіўнай бяспекі: рамянёў, шлемаў, дзіцячых утрымліваючых устройстваў.

У пяці населеных пунктах Асіповіччыны зарэгістравана ўсяго па адным жыхары. Гэта Слабодка, Востраў, Буда, Аляксандраўка і Журавец. Ва Уборку і Дубралёва прапісаных жыхароў удвая больш. А ў Зорцы, Ражышчы, Астроўках, Кляпчаным Масту, Задняй Градзе і Пабокавічах зарэгістравана па 3 насельнікі. Крычавец, п. Уборак, Заняцечча, Ясянёўка налічваюць па             4 жыхары. У параўнанні з папярэднікамі, Камарын, станцыя Асіповічы ІІІ, Верхі, Ульянаўка і Прыцерпа могуць лічыцца шматнаселенымі — маюць аж па 5 чалавек.