Раённы аддзел адукацыі, спорту і турызму райвыканкама на аказанні экскурсійных паслуг за студзень-жнівень зарабіў 410,3 тыс. рублёў. Самыя актыўныя экскурсанты сярод гарадскіх школ — СШ №№ 1, 2, гімназія, сельскіх — Каменіцкая і Свіслацкая. Найбольш папулярныя  аб’екты для наведвання — музей Вялікай Айчыннай вайны, Мірскі і Нясвіжскі замкі, сталічны аквапарк.

На станцыі Асіповічы з 17 верасня пачне спыняцца хуткасны электрацягнік бізнес-класа InterCity Гомель-Мінск-Гомель, час адпраўлення якога ў бок Мінска ў 21.14, у бок Гомеля — 8.24.

Жорнаўская эксперыментальная лясная база Iнстытута лесу Нацыянальнай акадэміі навук Беларусі сёлета адкрыла 5 новых доследных аб’ектаў, якія знаходзяцца ў Бабруйскім, Буда-Кашалёўскім, Мазырскім, Копыльскім і Асіповіцкім лясгасах. У лесагаспадарчую вытворчасць укаранілі 3 навукова-тэхнічныя распрацоўкі.

Раённы цэнтр сацабслугоўвання насельніцтва напачатку навучальнага года забяспечыў 135 аўтаномнымі пажарнымі апавяшчальнікамі 67 сямей, у тым ліку — 48 шматдзетных.

Філіял “БМЦ № 761 на станцыі Магілёў” ААТ “Дарбудмантажтрэст” зараз працуе на будаўнічых аб’ектах Крычава, дзе спецыялісты заняты капрамонтам жылых дамоў, якія належаць УКВП “Камунальнік”.

Мясцовы кансервавы завод з пачатку верасня заняты вырабам яблычных нектараў з мякаццю ў асартыменце. Усяго павінна сысці з канвеера 20 тысяч 3-літровых слоікаў. Дадзеная прадукцыя карыстаецца попытам сярод санаторыяў краіны. Таксама наладжаны выпуск салатаў з гародніны, якія закладваюцца ў паўлітровую шкляную тару. Спецыяльна для Узброеных Сіл краіны вырабляюцца кансерваваныя буракі і морква.

У аварыйную службу філіяла “Бабруйскае вытворчае ўпраўленне” РУП “Магілёўаблгаз” за студзень-жнівень паступіла 1.036 аварыйна-рамонтных заявак, у тым ліку па пашкоджанасці газавага абсталявання (пліт, катлоў, награвальнікаў) —199.

Па дадзеных раённага Цэнтра гігіены і эпідэміялогіі, на пачатак верасня ад укусаў кляшчоў пацярпелі 107 чалавек, з іх 39 дзяцей. Найбольшая колькасць выпадкаў зарэгістравана ў зоне дачнага пасёлка Трубінка, вёсках Вяззе, Лапічы, Ліпень, Смык. Патрапілі ў спіс Паплавы, Ніччо, Малая Гарожа, Караны, Цяплухі, Карытнае, Замошша, Свіслач, Верайцы, Пратасевічы, Дзераўцы, Сасновы і лесапаркавая зона ў раёне ААТ “АЗАА”. За 8 месяцаў 13 землякам, якія звярнуліся за меддапамогай, паставілі дыягназ лайм-барэліёз.