Больш за 16 тысяч жыхароў раёна з’яўляюцца членамі прафсаюзных арганізацый. На Асіповіччыне дзейнічаюць 152 “пярвічкі”, 5 з якіх створаны сёлета ў арганізацыях недзяржаўнага сектара эканомікі.

150 тон бярозавіку плануе нарыхтаваць вясною ААТ “Асіповіцкі кансервавы завод”. Зараз лінія прадпрыемства наладжана на выпуск нектараў — штомесяц з канвеера сыходзіць каля 10 тысяч трохлітровых слоікаў. Увесь асартымент прадукцыі прадстаўлены ў фірменным магазіне перапрацоўшчыка.

52 выпадкі захворвання на грып зарэгістраваны ў раёне на  11 лютага. Пераважная большасць з іх — дарослыя. Не забывайце аб мерах прафілактыкі, землякі!

Самым папулярным таварам студзеня ў магазіне “Друкар” РУП “Бабруйская ўзбуйненая друкарня” сталі календары: рэалізавана 800 настольных і 300 насценных “лічыльнікаў дзён” на 17 мільёнаў рублёў.

Дар’я Домрачава, Тэа, Георгій Калдун распачынаюць спіс любімцаў асіповіцкай моладзі. Такі вывад можна зрабіць па колькасці падрыхтаваных “валянцінак” у ходзе акцыі “Валянцінка майму куміру”, прымеркаванай да 14 лютага. Як паведамілі ў райкаме БРСМ, пасланні ўжо адпраўлены ў сталіцу, дзе і будуць перададзены адрасатам.

566 мерапрыемстваў праведзена ўстановамі цэнтралізаванай клубнай сістэмы раёна ў першым месяцы года — на 3 дзясяткі больш, чым летась.

Паўсотні домаўладанняў, у якіх пражываюць сем’і неабароненых катэгорый, абследавана з пачатку года Дрычынскім сельвыканкамам, зроблена 12 прадпісанняў датычна пажарнай бяспекі памяшканняў. Працягваецца на тэрыторыі сельсавета работа па ліквідацыі наступстваў цыклона “Даніела”: расчышчаюцца бакавыя дарогі, падходы да грамадскіх могілак.

315 кілаграмаў малака ад каровы атрымана ў студзені ў сельгаспрадпрыемствах раёна — на 12,2 кг менш, чым летась. Самыя высокія надоі атрымаў філіял “Белшына-агра” ААТ “Белшына” — 481 (+67,4) кг і ААТ “ЖорнаўкаАГРА” — 359 (+44,6).

69 пазіцыю займае Асіповіччына сярод 118 раёнаў рэспублікі па выніках работы ў жывёлагадоўлі за 2015 год.