Чыгуначная станцыя Асіповічы па выніках III квартала стала лепшай сярод калектываў Магілёўскага аддзялення дарогі і за дасягнутыя ў вытворчым спаборніцтве высокія паказчыкі ўзнагароджана дыпломам.

Раённае спажывецкае таварыства працягвае закупку гародніны: у кастрычніку засекі папоўнілі 59,8 тоны бульбы, 17,9 — капусты, 8 — морквы. Вядзецца і актыўны прыём другаснай сыравіны: так, за мінулы месяц паступіла 441,4 тоны лому чорных металаў, 18,4 — каляровых, 30,6 тоны макулатуры, 2,6 — шклабою, 200 кг другасных тэкстыльных матэрыялаў.

Вакальная група РЦК “Сяброўкі” пад кіраўніцтвам Святланы Раковіч прыняла ўдзел у кастынгу Магілёўскай вобласці музычнага праекта СТБ “Спяваючыя гарады-3”. На жаль, у далейшыя туры шоу-праекта група не прайшла, але адвазе і энергіі “сябровак”, чый узрост больш за 60 гадоў, можна толькі па-добраму пазайздросціць.

На дыспансерным уліку ўрача-псіхіятра-нарколага наркалагічнага кабінета райпаліклінікі зараз знаходзіцца 1.011 чалавек, на прафілактычным — 486.

Раённай энергаінспекцыяй філіяла “Энерганагляд” РУП “Магілёўэнерга” сёлета ў эксплуатацыю дапушчана 58 новых домаўладанняў, праведзена 929 прафілактычных гутарак з насельніцтвам па бяспечнай эксплуатацыі энергасетак і распаўсюджана 920 памятак. Па выніках праверкі 411 жылых дамоў выдадзена 308 прадпісанняў на ліквідацыю заўваг па тэхнічным стане і пажарнай бяспецы.

Да належачых ААТ “Гандаль” 16 харчовых і 5 прамтаварных магазінаў, рэстарана “Юбілейны” і кафэ “Юнацтва” неўзабаве далучыцца яшчэ адзін пункт грамадскага харчавання: будаўніцтва на вул. Сумчанкі новага кафэ, у якога пакуль няма назвы, падышло да канца, наперадзе — аддзелачныя работы.

Зборная каманда па баскетболе Асіповіцкага каледжа ў абласной спартакіядзе навучэнцаў устаноў прафесійна-тэхнічнай і сярэдняй спецыяльнай адукацыі выйшла ў фінал спаборніцтваў і заваявала “срэбра”.