Асіповічы: коратка аб розным
Яравая сяўба на Асіповіччыне на ўчарашнюю раніцу дасягнула 40-працэнтнага рубяжу: сеялкі пабывалі ўжо на 6.000 гектарах. Ранніх збожжавых і зернабабовых культур пасеяна 91%. Па ўсіх пазіцыях лідзіруе філіял “Белшына-агра” ААТ “Белшына”.
Больш за паўтысячы хлопчыкаў і дзяўчынак атрымаюць сёлета пуцёўкі ў стацыянарныя кругласутачныя лагеры “Пціч” і “Крыніца”. Усяго ж на работу ўсіх аздараўленчых лагераў са сродкаў рэспубліканскага бюджэту будзе выдзелена звыш 1,5 млрд рублёў.
Пратасевіцкі СДК стаў пераможцам у сваёй групе ў штогадовым спаборніцтве на лепшую арганізацыю работы па захаванні і развіцці культуры Магілёўскай вобласці па выніках 2015 года.
1 мільярд рублёў атрымае раён сёлета з рэспубліканскага дарожнага фонду. Сродкі будуць накіраваны на капітальны рамонт вуліцы Рабоча-Сялянскай — яна з’яўляецца часткай рэспубліканскай дарогі.
За I квартал пральняй ААТ “Асіповіцкі КБА” аказана паслуг на 585,8 млн рублёў, хімчысткай — 36,4.
Каля 3,5 тысячы чалавек у дзень у сярэднім наведваецца ў магазін “Еўраопт” па вуліцы Сумчанкі. З надыходам цёплага перыяду колькасць пакупнікоў павялічваецца.
Акцыя “Чысты вадаём”, арганізаваная рэспубліканскім ДГА “Беларускае таварыства паляўнічых і рыбаловаў”, працягнецца па 27 красавіка.
8.430 тон мукі выпушчана за студзень-сакавік Асіповіцкім вытворчым участкам ААТ “Бабруйскі камбінат хлеба-прадуктаў”. Iржаной — 5.862 тоны, пшанічнай — 2.532, аўсянай — 36.
Удзельнікам II міжнароднага фестывалю-конкурсу таленавітых дзяцей і моладзі “Новыя вяршыні-2016”, які прайшоў у сталіцы, быў і калектыў “Крышталь” МПЦ “Равеснік”. Свае музычныя нумары на суд журы прадставіла малодшая і старэйшая групы.
Экспарт паслуг па міжнародных перавозках аўтапарка № 19 за I квартал склаў $23,8 тысячы — на 26% больш, чым за такі ж перыяд летась. На ўзроўні 217% міжнародны прабег: 135.133 кіламетры супраць 62.304.
Нагадваем: артыкулам 15.57 Кодэкса краіны “Аб адміністрацыйных правапарушэннях” за выпальванне сухой расліннасці, траў на корані, а таксама ржышча і пажніўных астаткаў на палях або непрыняцце мер па ліквідацыі палаў на зямельных участках прадугледжана адміністрацыйная адказнасць — штраф у памеры ад 10 да 40 базавых велічынь.