З 1 красавіка па 30 мая забаронена лоўля ўсіх відаў рыбы ў рыбалоўных угоддзях вобласці, за выключэннем аматарскага рыбалоўства адной вудай ці спінінгам у светлы час сутак з берага. Лоўля шчупака звычайнага забаронена з 1 сакавіка па 15 красавіка, судака — з 15 красавіка па 30 мая.

Краязнаўца Станіслаў Лукашэвіч на рэспубліканскім семінары “Гісторыя праваслаўя роднага краю: вопыт і методыка вывучэння”, які прайшоў у прыходзе ў гонар іконы Божай Маці “Усіх Смуткуючых Радасць”, прадставіў  удзельнікам форуму макет кнігі “Памяць праваслаўя”, прысвечанай гісторыі праваслаўя Асіповіччыны. Будзем чакаць з’яўлення кнігі на паліцах бібліятэк і кнігарняў.

У Дараганаўскай участковай бальніцы працуе 35 ложкаў сястрынскага догляду: на пачатак года тут знаходзілася 29 пацыентаў, зараз — 33. У стацыянары за студзень-люты кваліфікаваную медыцынскую дапамогу атрымалі 59 вяскоўцаў і 31 жыхар райцэнтра. Лячэнне і догляд за хворымі ажыццяўляюць урач, 15 прадстаўнікоў сярэдняга медыцынскага персаналу, у тым ліку фельчар і акушэр, 21 работнік займаецца гаспадарча-абслуговай дзейнасцю.

У Дрычынскім сельсавеце, у 10 населеных пунктах якога пражывае 340 чалавек, з пачатку года выдадзена 116 даведак аб месцы жыхарства і складзе сям’і, 1 — аб нараджэнні, складзена 7 актаў аб смерці, здзейснена тры натарыяльныя дзеянні: аформлены 2 даверанасці і 1 завяшчанне.

Кіёскі “Магілёўсаюздрука” ў сакавіку ў чарговы раз парадавалі калекцыянераў навінкамі. Прыхільнікі рарытэтных машын ужо могуць прыступаць да зборкі мадэлі легендарнага аўтамабіля “ЗИС-110” — калекцыя налічвае 120 выпускаў. Пакупнікі збору “Чтимые иконы и чудотворные образы” не толькі даведаюцца пра звычаі Рускай праваслаўнай царквы, гісторыю свят і пастоў, але і папоўняць свае калекцыі 24 асвечанымі абразамі. З творчасцю вялікіх архітэктараў пазнаёміць серыя кніг у цвёрдай вокладцы з аднайменнай назвай.