Каля паўсотні асіпаўчан ва ўзросце ад 50 да 65 гадоў па асабістай ініцыятыве прайшлі прафілактычнае абследаванне на прадмет выяўлення захворванняў кішэчніка ў раённай бальніцы. Зараз запіс на правядзенне каланаскапіі вядзецца ўжо на красавік.

Фінал конкурсу прафмайстэрства “Майстар года” адбыўся днямі ў абласным цэнтры. У ім удзельнічалі педагогі з устаноў прафесіянальна-тэхнічнай і сярэдняй спецыяльнай адукацыі, у тым ліку і майстар вытворчага навучання нашага каледжа Антон Баравік. Ён прадэманстраваў работу ў намінацыі “Умееш сам — навучы другога”, — часопісны столік з падручных матэрыялаў.

У раённым Цэнтры народных рамёстваў стараюцца папулярызаваць розныя тэхнікі дэкаратыўна-прыкладнога мастацтва. Вось і ў чацвер з 11 да 13 гадзін пройдзе майстар-клас роспісу па шкле Маргарыты Жыгалкоўскай.

Удзел у рэспубліканскім фестывалі “Global Fashion Show”, які прайшоў у нядзелю ў сталіцы, прынёс поспех педагогам дадатковай адукацыі ЦТДіМ Святлане Багаевай і Ганне Смолка. Тэатр мод пад іх кіраўніцтвам прадставіў на суд журы 2 калекцыі адзення “Магія кветак”, адна з якіх удастоена Дыплома I ступені.

Вяззеўскі сельсавет пасля наступстваў “Даніелы” ліквідаваў 7 аварыйных дрэў на грамадзянскіх могілках у вёсках Замошша і Ясянец. Немалая ўвага надаецца і пытанням добраўпарадкавання. З пачатку года выдадзена прадпісанне мясцоваму жыхару за безгаспадарчае ўтрыманне прысядзібнага ўчастка. На парадку дня — пытанне аб зносе 14 пустуючых дамоў, лёс 11 вырашаны летась.

У асабістых гаспадарках грамадзянамі раёна ўтрымліваецца  313 кароў. Найбольш за ўсё рагуль у Вяззеўскім сельсавеце — 59, Лапіцкім — 52, Дрычынскім — 42, Ліпенскім — 34, Пратасевіцкім — 25.

У раёне налічваецца 13 лазняў, з іх 3 — у горадзе. Столькі ж адносяцца да 2 разраду. У іх памывачны білет каштуе 18 тысяч рублёў, у безразрадных — 15. Летась было здзейснена амаль 43 тысячы чалавекапамывак. Найбольшая колькасць прыпадае на гарадскую лазню па вуліцы Кастрычніцкай — каля 17,5 тысяч, сярод сельскіх лідзіруе пасёлак Ялізава — 5 тысяч.

У павільёнах мясцовага філіяла ААТ “Магілёўсаюздрук” з’явіліся ў продажы новыя калекцыйныя выданні “Рыбалка. Энцыклапедыя рыбалова”, “Дыназаўры і свет Юрскага перыяду”, “Вялікія дынастыі свету”, якія ўжо паспелі знайсці сваіх спажыўцоў. Усяго на прылаўках знаходзіцца 53 найменні розных калекцыйных падборак.