Паводле інфармацыі КДУП “Адзіны разліковы цэнтр”, з пачатку года запазычанасць па аплаце паслуг “Райсэрвіса” складае 395 млн руб. па 836 асабовых рахунках, 180 мільёнаў павінны УКП ЖКГ 430 уладальнікаў рахункаў, у “Водаканала” 996 даўжнікоў, якія не выплацілі 32 млн рублёў.

Удала выступілі на міжнародным харэаграфічным конкурсе “Феерыя танца“ ў Мінску творчыя калектывы раённага Цэнтра культуры і вольнага часу. “Бронзу” ў сваёй намінацыі ўзяў узорны ансамбль танца “Асарці”, а народны ансамбль эстраднага танца “Капрыз” заваяваў дыпломы I і III ступеняў.

Грыпу — не! На сёння вакцынацыю супраць небяспечнага захворвання прайшлі ўжо 13.610 землякоў, з іх 4.341 дзіця. 6.334 чалавекі прышчапіліся за кошт рэспубліканскага бюджэту, 5.646 — мясцовага. Прадпрыемствы аплацілі вакцыну 1.628 сваім работнікам.

Жыхары вёсак Цяплухі і Замошша Вяззеўскага сельсавета ў наступным годзе змогуць падлучыцца да газавай артэрыі: у два таварыствы па падвядзенні газу ўступілі 90 і 60 домаўладальнікаў.

75 сем’яў, якія атрымалі статус шматдзетных, з’явілася ў раёне з пачатку года, і ў кастрычніку колькасць сем’яў, што выхоўваюць трох і больш дзяцей, упершыню перасягнула паўтысячную мяжу. Як паведамілі ў райцэнтры сацабслугоўвання насельніцтва, 63 з 503 шматдзетных сем’яў ужо звярнуліся за прызначэннем сямейнага капіталу.

У пункце прыёму другаснай сыравіны райста за 10 месяцаў прынята 3.309,8 тоны чорных і 118,3 — каляровых металаў. Ад арганізацый і насельніцтва паступіла адпаведна 223,5 і 138,6 тоны макулатуры, 2,5 і 7,3 — поліэтылену, 5,3 і 2,4 — другаснай тэкстыльнай сыравіны. Насельніцтвам здадзена таксама 68 тон шклабою, арганізацыямі — толькі 2,3 тоны.

ААТ “АЗАА” пашырае лінейку вырабляемай прадукцыі. Адна з апошніх навінак, якая сышла з канвеера ў пачатку лета, — аднамесная кабіна аператара. Аснову яе складае гнуты зварны металічны каркас, вонкавая ашалёўка — шклапластыкавыя панэлі. Больш за 80 вырабаў у сінім і жоўтым каляровых варыянтах ужо пастаўлена на завод “Магілёўтрансмаш”.