116 УКХ-прыёмнікаў, якія даюць магчымасць лавіць эфір Першага нацыянальнага канала радыё, рэалізавана жыхарам горада і сельскіх населеных пунктаў райвузлом электрасувязі ў перыяд з 7 красавіка.

Тыдзень лесу, у якім на Асіповіччыне прыняло ўдзел больш за 750 чалавек, прайшоў эфектыўна: пасаджаны лес (у асноўным сасна і елка) на 20,2 гектара, дапоўнена 26 га лясных культур, ачышчана 9,1 га ўгоддзяў, сабрана 130 кубоў смецця.

Больш за 2 тысячы сувенірных кошыкаў з салодкім тэматычным начыннем — шакаладнымі анёльчыкамі, свечкамі, яйкамі — выпушчана на ТАА “Белга-Прам” да Вялікадня. Падарачныя наборы з дэкарыраванымі фігуркамі могуць задаволіць густ любога пакупніка.

Велікодныя сустрэчы пройдуць у раённым гісторыка-краязнаўчым музеі 26 і 27 красавіка. Удзел у іх будуць прымаць вучні гарадскіх і сельскіх школ. Праграма разнастайная: лекторыі, абмен меркаваннямі, майстар-клас па роспісе яек. У рамках сустрэч арганізуецца выстава творчых работ “Вялікдзень вачамі дзяцей”.

Стаўку на агуркі робяць сёлета працаўнікі ААТ “Асіповіцкі кансервавы завод” — гэты прадукт набывае ўсё большую папулярнасць. Калі летась з канвеера сышло 50 тысяч 3-літровых слоікаў, то ў надыходзячым сезоне колькасць закрутак з назвай “Агуркі марынаваныя беларускія” вырашана павялічыць. У асноўным гэтая гародніна пастаўляецца фермерамі са Століншчыны.

Блакітнае паліва сёлета працягне паступаць у дамы землякоў. Да канца года раён газазабеспячэння філіяла РУП “Магілёўаблгаз” плануе здаць у эксплуатацыю тры асноўныя аб’екты: трэці пускавы комплекс “Ялізава” на 147 абанентаў; правесці газ у 22 дамы па вуліцы Шасейнай у Ясені; завяршыць другі пускавы комплекс на 112 абанентаў у Ліпені.

Вярнуць цікавасць да жывой кнігі — такую мэту ставіць наш філіял ААТ “Магілёўсаюздрук”, арганізуючы прымеркаваную да Сусветнага дня кніг і аўтарскага права выставу-продаж. Спектр прапановы чакаецца шырокі: дзіцячая літаратура, мастацкія творы, кнігі па псіхалогіі, кулінарыі, энцыклапедычныя зборнікі. Гэтую і іншую друкаваную прадукцыю можна будзе набыць 23 красавіка ў “саюздрукаўскай” гандлёвай кропцы па вул. Паркавай, 14.