Футбольны матч у рамках чэмпіянату вобласці паміж асіповіцкай “Алімпіяй” і чавускай “Нівай” пераносіцца на 26 жніўня. Сустрэнуцца каманды на стадыёне “Юнацтва” ў 18 гадзін.

7 тон напітку безалкагольнага “Хлебны квас” рэалізавана ў мінулым месяцы ААТ “Асіповіцкі хлебазавод”, што значна перавышае мінулагодні паказчык. Высокай запатрабаванасці карыснага напою спрыяе ў тым ліку і спякотнае надвор’е.

Больш за восемсот грамадзян Расіі, якія атрымалі дазвол на пастаяннае пражыванне і дакументаваныя відам на жыхарства, зарэгістраваны на тэрыторыі раёна.

44 маладыя спецыялісты нядаўна прыступілі да працы ў сельгаспрадпрыемствах раёна. З іх 18 маюць дыпломы ВНУ, 26 атрымлівалі веды ў сярэдніх спецыяльных навучальных установах. З агульнай колькасці 15 чалавек вучыліся па мэтавых накіраваннях.

Новая экспазіцыя, прысвечаная перыяду Расійскай Імперыі, дзейнічае зараз у раённым гісторыка-краязнаўчым музеі. Аб’яднала яна шмат цікавых экспанатаў, сярод якіх — грошы тых часоў і фотаздымкі.

“Вясёлкавы масток” — гэтак называецца другі зборнік вершаў нашай таленавітай зямлячкі Лёлі Багдановіч, які нядаўна выйшаў у свет. Такую кнігу атрымаюць усе пераможцы гульні-конкурсу па беларускай мове і літаратуры “Буслік-2015”.

У рамках абласной міжведамаснай акцыі “У школу з радасцю”, якая праходзіць на працягу бягучага месяца, 18 жніўня прамую лінію па тэлефоне 20-7-21 з 10 да 12 гадзін правядзе загадчык педыятрычнага аддзялення паліклінікі Святлана Эдуардаўна Жыткова.