АКЦЫЯ “СТОП-СПАЙС” праводзіцца ў рэспубліцы па 23 мая. Яе мэта — папярэджванне і спыненне распаўсюджвання наркаманіі ў падлеткавым асяроддзі.

Змяняецца нумар тэлефона кругласутачнага аўтаадказчыка КДУП “Адзіны разліковы цэнтр” з 1 чэрвеня. Для перадачы паказанняў індывідуальных прыбораў уліку вады з 10 па 25 чысло месяца звяртайцеся па тэлефоне 73-3-70.

Традыцыйная акцыя “Дзень адчыненых дзвярэй у беларускіх аграсядзібах” пройдзе 24 мая. Перад патэнцыяльнымі турыстамі гасцінна расчыняць дзверы аграсядзібы “Гостиное подворье” (Лапічы), “Каменная Горка” і “Вясковыя фарбы” (Свіслач). Усяго ў вобласці плануюць прыняць удзел у акцыі больш за 30 аграсядзіб, а па ўсёй краіне — каля 500 турыстычных аб’ектаў.

33 добраахвотныя дружыны дзейнічаюць сёння ў раёне. Дружыннікі выйшлі на ахову грамадскага парадку 1.016 разоў, сумесна з супрацоўнікамі РАУС правялі 87 рэйдаў, выявілі 62 адміністрацыйныя правапарушэнні.

Чарговая навінка распрацавана на парфумерна-касметычнай фабрыцы “Сонца”. Гэта — сродак “Фядора” для мыцця садавіны, гародніны, ягад, зеляніны і посуду, які лёгка выдаляе васкавы налёт, плесень, тлушч, выдатна змываецца і бяспечны для здароўя.

28 мая ў РЦК пройдзе канцэрт Нацыянальнага акадэмічнага аркестра сімфанічнай і эстраднай музыкі Рэспублікі Беларусь. Пачатак у 17 гадзін.

Са студзеня па май, па дадзеных аддзела запісу актаў грамадзянскага стану, землякі заключылі 120 шлюбаў: пажаніліся 89 пар гараджан і 31 — сельскіх жыхароў. Сярэдні ўзрост жанчын і мужчын, якія ўступілі ў шлюбны саюз, склаў 31 і 34 гады адпаведна, прычым 1 жаніх і 2 нявесты яшчэ не дасягнулі паўналецця, а 6 нявест і 9 жаніхоў сталі мужам і жонкай, перавысіўшы 60-гадовы ўзрост.

У абласным аглядзе-конкурсе непрафесійных калектываў, што прайшоў 18 мая ў рамках рэспубліканскай акцыі “Харавое веча”, народны ансамбль народнай песні і музыкі “Дзівакі” РЦКіА і народны ансамбль народнай песні “Вечарынка” Ялізаўскага СДК сталі ўладальнікамі дыпломаў II ступені. Гран-пры конкурсу заваяваў народны эстрадны ансамбль “Парадыз” Ліпеньскага СДК: выкананая імі песня “Недаром мы зовемся белорусы!”, аўтарам якой з’яўляецца гукааператар аўтаклуба цэнтралізаванай клубнай сістэмы раёна Андрэй Язвінскі, прагучыць у фінале гала-канцэрта акцыі.