АДУКВП “Райсэрвіс” да майскіх свят расквеціў горад стракатымі цюльпанамі — больш за 6 тысяч цыбулін раслін высаджана на клумбы. Гэтым кветкам аддалі перавагу з-за яркай афарбоўкі і добрай прыжываемасці. Зараз рыхтуюць да высадкі тагеціс, агератум, астры, петунію і іншыя аднагадовыя культуры.

У маі распачаўся сезон фантанаў. Спачатку падключылі штучны вадаток на сажалцы ў парку і каля раённага Цэнтра культуры, пазней зацурчаў фантан у скверы каля райаддзела адукацыі. Першы з названых, дарэчы, плануецца рэканструяваць: змяніць кампазіцыю і напрамак струменяў.

Бібліятэчная сетка раёна ўжо правяла шэраг мерапрыемстваў, прымеркаваных да свята Перамогі. Выдадзены зборнік вершаў паэтаў Асіповіччыны “Прайшла па зямлі вайна”. У раённай дзіцячай бібліятэцы прайшоў конкурс чытачоў “Дзеці пра вайну”. Усе бібліятэкі задзейнічаны ў правядзенні гістарычнай экспедыцыі “Нам не выкрасліць з памяці вайну”, у рамках якой адбыліся ўрокі памяці, вусныя часопісы.

Прадпрыемствы і ўстановы павіншавалі ветэранаў вайны са святам і ўручылі ім каштоўныя падарункі. Так, АДУКВП “Водаканал” тром змагарам уручыў мікрахвалевыя печы і мультыварку. Прадстаўнікі ДЛГУ “Жорнаўская эксперыментальная лясная база Iнстытута лесу НАН Беларусі” парадавалі двух ветэранаў матэрыяльнай дапамогай па паўмільёна рублёў, а аднаго з пажылых людзей забяспечылі піламатэрыяламі на рамонт паркана.

Смачная і карысная прадукцыя, якая вырабляецца на ААТ “Асіповіцкі хлебазавод” і філіялам “Асіповіцкі” ААТ “Бабушкина крынка” — кіруючая кампанія холдынга “Магілёўская малочная кампанія “Бабушкина крынка”, у чарговы раз атрымала высокую ацэнку: прадпрыемствы сталі лаўрэатамі прэстыжнага конкурсу “Лепшыя тавары Рэспублікі Беларусь” за 2014 год.

Філіял Аўтапарк № 19 ААТ “Магілёўаблаўтатранс” абслугоўвае 31 прыгарадны і 16 гарадскіх маршрутаў. Штодзённа на лініі працуе 5 кантралёраў пасажырскага транспарту, якім даводзіцца высаджваць да 15 безбілетных пасажыраў у дзень.

Жадаючым трапіць у катэгорыю “зайцоў” трэба памятаць, што адмова ад аплаты праезду пазбаўляе магчымасці набываць паліва для выканання перавозак і запчастак для рамонту аўтобусаў. Аўтапарк за ўласныя сродкі страхуе пасажыраў ад няшчасных выпадкаў на суму да 5 тысяч еўра. Калі адсутнічае праязны дакумент, пры надыходзе страхавога выпадку пасажыр не можа разлічваць на грашовае пакрыццё.