У Асіповіцкім вопытным лясгасе ў школьных лясніцтвах займаюцца 106 навучэнцаў, за якімі замацавана 5.538 гектараў лесу. Па мэтавым накіраванні ў БДТУ на вочнай форме навучаюцца 6 выпускнікоў, столькі ж на завочнай, 1 — у Полацкім дзяржаўным лясным каледжы, 3 — у Бабруйскім дзяржаўным лесатэхнічным каледжы. З 2012 года калектыў папоўніўся 37 маладымі спецыялістамі.

АДУКВП “Райсэрвіс” круглы год вядзе ямачны рамонт дарог. За тыдзень “залатваюць” каля 100 квадратных метраў. Зімой яміны запаўняюць спецыяльнымі халоднымі сумесямі, з надыходам цёплых дзён пераходзяць на бітумную эмульсію. Займаюцца гэтай справай 2 брыгады. У першую чаргу рамантуюцца дарогі з аўтобусным рухам.

Работнікі ДРБУ № 199 прыступілі да афарбоўкі аўтобусных прыпынкаў. Рамонтна-аднаўленчыя работы праводзяцца штогадова, але праз нейкі час нядаўна прыгожыя дарожныя кропкі набываюць выгляд, які засмучае наведвальнікаў: абмаляваныя, абклееныя паперкамі-аб’явамі сцены, нецэнзурныя надпісы, паламаныя лаўкі. Дарожнікі нагадваюць: чысціня і парадак ствараецца для вас, землякі! Паважайце працу людзей!

Магілёўскія майстрыхі пачалі ткаць самы доўгі пояс у краіне. У абласны цэнтр па чарзе прыязджаюць ткачыхі з усіх раёнаў вобласці, каб вырабіць свой адрэзак, які будзе адлюстроўваць традыцыйны арнамент кожнага рэгіёна. Дырэктар раённага цэнтра народных рамёстваў і дэкаратыўна-прыкладнога мастацтва Валянціна Туркіна таксама прыме ўдзел у гэтай акцыі. Плануецца, што пояс атрымаецца не карацей за 20 метраў. Убачыць яго можна будзе на свяце “Александрыя збірае сяброў” у Шклове на Купалле.

Раённы савет ветэранаў арганізаваў экскурсію прадстаўнікоў розных ветэранскіх згуртаванняў у сталічны музей гісторыі Вялікай Айчыннай вайны. Зараз пажылыя людзі рыхтуюцца да рэспубліканскага суботніка. Яны прымуць у ім удзел разам з працоўнымі калектывамі, з якіх пайшлі на пенсію.

Раённае ўпраўленне па працы, занятасці і сацыяльнай абароне сведчыць, што зараз на ўліку знаходзіцца 230 беспрацоўных і прапаноўваецца 87 вакансій. Запатрабаванымі па-ранейшаму застаюцца ўрачы, фельчары, медыцынскія сёстры, ветэрынары, інжынеры. Вакансіі па рабочых прафесіях амаль адсутнічаюць.