Сёння на цэнтральнай плошчы праходзіць святочны перадвелікодны кірмаш, у якім прымаюць удзел гандлёвыя арганізацыі горада, мясцовы хлебазавод і ААТ «Рыбгас «Свіслач».

Распачаліся падрыхтоўка і прыём заявак на ўдзел у традыцыйным раённым аглядзе-конкурсе дзіцячых і маладзёжных творчых калектываў і выканаўцаў «Хваля збірае сяброў», які пройдзе ў Вяззеўскім сельскім Доме культуры 23 мая. За права называцца лепшымі пазмагаюцца салісты, фальклорныя і танцавальныя калектывы, вакальныя групы, музыкі, майстры дэкаратыўна-прыкладнога мастацтва.

Да 70-годдзя Вялікай Перамогі калектыў настаўнікаў і вучняў дзіцячай школы мастацтваў № 1 рыхтуе святочную канцэртную праграму, з якой выступіць у навучальных установах горада і раёна.

У 18 садаводчых таварыствах Асіповіччыны налічваецца каля 1.100 незанятых участкаў, плошча якіх складае звыш 98 гектараў. Сама больш свабоднай зямлі для вядзення калектыўнага садаводства ў СТ «Ясень», «Татарка» і «Лясная паляна» — 218, 154 і 142 участкі адпаведна.

Дрычынскім сельсаветам з пачатку года ліквідаваны 3 пустуючыя домаўладанні, выпісаны 64 прадпісанні на выпраўленне парушэнняў правіл добраўпарадкавання. На пасяджэнне савета грамадскага пункта аховы правапарадку сёлета было запрошана 15 нядобранадзейных грамадзян, якія патрабуюць павышанай увагі з боку ўлады, 5 з іх працаўладкавана.

Магазін «Еўраопт» з гандлёвай плошчай 147 «квадратаў» днямі адкрыўся ў горадзе па вуліцы Iнтэрнацыянальнай, 52а. Там атрымалі рабочыя месцы 16 чалавек. За першыя 6 дзён яго наведала ўжо каля 4 тысяч пакупнікоў.

Кандытарскі цэх камбіната грамадскага харчавання за студзень-сакавік праз тры гандлёвыя кропкі рэалізаваў асабістай прадукцыі на 310 млн рублёў. Попытам карыстаюцца вырабы з усіх відаў цеста, перад Вялікаднем добра разыходзяцца кулічы. У асартыментным пераліку звыш 30 найменняў.

У цэнтры творчасці дзяцей і моладзі праходзіць выстава-конкурс «Захоўваем законы дарог», арганізаваная сумесна з аўтаінспекцыяй.

Самай папулярнай газетай сярод падпісчыкаў-землякоў, безумоўна, лічыцца «Асіповіцкі край». На другім месцы — «СБ. Беларусь сегодня», на трэцім — «Друг пенсионера». Сярод часопісаў самы высокі рэйтынг мае «Народны доктар», за ім — «Тысяча советов» і «Сваты». Аблюбавалі асіпаўчане і новае выданне штотыднёвіка «Советчица».

Будаўнічае ўпраўленне № 2 на ст. Асіповічы зараз вядзе будаўніча-мантажныя работы па электрыфікацыі ўчасткаў «Гомель-Жлобін-Асіповічы» і «Жлобін-Калінкавічы. 2 чарга».