У Карытненскім сельсавеце з пачатку года знесены трухлявы будынак і 600 метраў старой агароджы, утылізавана 32 “квадраты” зрэзаных галін дрэў і хмызняку, знішчана 7 несанкцыянаваных сметнікаў. Наведзены парадак на могілках у Каранах і Карытным. Па выніках абследавання 176 аб’ектаў выпісана 130 прадпісанняў на выпраўленне парушэнняў правілаў добраўпарадкавання: 65 домаўладальнікамі і 4 арганізацыямі. Недахопы ўжо ліквідаваны.

ААТ “Рыбгас “Свіслач” за студзень-сакавік рэалізавана 93 тоны жывой рыбы. Дарэчы, красавік — апошні ў бліжэйшы час месяц, каб атрымать асалоду ад смачных і карысных карпаў і таўсталобікаў: у маі сезон рэалізацыі свежай рыбы скончыцца і зноў пачнецца толькі ў канцы лета.

ДУКВП “Райсэрвіс” займаецца дадатковым асвятленнем скрыжаванняў і пешаходных пераходаў. Асаблівая ўвага — бяспецы дзяцей: на пераходзе, які вядзе да СШ № 1, гімназіі і басейна, устаноўлена 2 пражэктары. Усяго ж у горадзе з’явілася каля 20 новых ліхтароў.

Цэнтральная райбальніца летась зарабіла за кошт пазабюджэтнай дзейнасці звыш 5,5 млрд рублёў, на медыцынскіх платных паслугах — 3,2 мільярда, што складае 148,6 і 128,8% да паказчыкаў 2013 года. Прырост даходаў звязаны, у асноўным, з павышэннем тарыфаў на паслугі.

Аддзелам прымусовага выканання ў 2014 годзе скончана 12.461 з 19.040 выканаўчых вытворчасцей. Сярэднямесячная нагрузка на судовага выканаўцу на Асіповіччыне з’яўляецца адной з найбольш высокіх у вобласці — 179,7 выканаўчых вытворчасцей.

Народны ансамбль эстраднага танца “Капрыз” і ўзорны ансамбль танца “Асарці” рыхтуюцца прыняць удзел у IV адкрытым конкурсе харэаграфічнай творчасці “Брава, дзеці!”, які пройдзе 5 красавіка ў Мінску.

Першай шматдзетнай сям’ёй, якая звярнулася ў раённы цэнтр сацыяльнага абслугоўвання за прызначэннем сямейнага капіталу, сталі Iрына і Аляксей Стэльмахі з аг. Лапічы.

Раённай энергаінспекцыяй у I квартале праверана 120 бытавых абанентаў. За парушэнне правілаў карыстання электраэнергіяй да адміністрацыйнай адказнасці прыцягнута 8 чалавек.