Міжнародная экалагічная акцыя “Гадзіна Зямлі” сёлета пройдзе 28 сакавіка з 20.30 да 21.30. Давайце станем яе ўдзельнікамі і мы — варта проста выключыць у гэты час святло і некаторыя электра-прыборы.

800 тон бярозавіку з 1.150 запланаваных ужо нарыхтавана апошнімі тыднямі працаўнікамі ДДЛГУ “Асіповіцкі вопытны лясгас”. Найбольшую лепту ў гэту справу ўнеслі Каранскае і Брыцалавіцкае лясніцтвы. Асноўны закупшчык карыснага прадукту для перапрацоўкі — кампанія “Аазіс Груп” з Бабруйска.

ТАА “Асіповічыгазбуд” стала лаўрэатам конкурсу “Лепшы прадпрымальнік 2014 года Магілёўскай вобласці”. Усяго аргкамітэтам было разгледжана каля сотні заявак суб’ектаў прадпрымальніцтва, з якіх 48 адзначаны дыпломамі і прызамі.

Неспрыяльным аказаўся гэты сезон для пасеваў азімага рапсу: у выніку праведзеных даследаванняў выяўлена, што на асіповіцкіх палях за халодныя месяцы загінула больш за 90% названай культуры.

370 хлопчыкаў і дзяўчынак з устаноў адукацыі Асіповіччыны праводзяць вясновыя канікулы ў школьных аздараўленчых лагерах. Планы работы прадугледжваюць шырокі спектр выхаваўчых і забаўляльных мерапрыемстваў.

Стылізаваны танец “Пад небам Iспаніі” прынёс Дыплом III ступені і кубак калектыву ўсходняга танца “Анахата” Дома культуры Асіповічы Магілёўскага культурна-спартыўнага цэнтра на чэмпіянаце Беларусі па народных танцах і Bollywood.

352 каровы трымаюць гаспадары прыватных падсобных гаспадарак у сельскіх населеных пунктах Асіповіччыны і райцэнтры. На жаль, за папярэдні год колькасць рагуль скарацілася больш чым на сотню.

Свіслацкі сельсавет — лідар у раёне па колькасці аграэкасядзіб: тут іх 9. Найбольшай жа папулярнасцю карыстаецца сядзіба “Краснае”.

Геліяводанагравальная ўстаноўка з’явіцца сёлета ў СВК “Калгас “Авангард”. Увод навінкі запланаваны праграмай энергазберажэння.