“Здаровае харчаванне — выбар сучаснага спажыўца”. Менавіта пад такім дэвізам сёлета пройдзе Дзень спажыўца, які штогод адзначаецца ва ўсім свеце 15 сакавіка.

РВПС “Белпошта” ў 2014 годзе даставіла землякам 12.583 міжнародныя дробныя пакеты, за студзень-люты бягучага — звыш 1,5 тысячы. Зваротны адрас большасці такіх адпраўленняў — Кітай.

ДУКВП “Райсэрвіс” закуплена і ўжо высаджана ў цяпліцы насенне кветак на суму каля 18 млн руб. Акрамя разнастайных адналеткаў, вуліцы і двары горада ўпрыгожаць і розныя гатункі цюльпанаў, 600 цыбулін якіх набыты яшчэ восенню.

Супрацоўнікамі Асіповіцкага і Бабруйскага АУСТ у 2014 годзе выяўлена 11 фактаў рэалізацыі, захоўвання і дастаўкі таварна-матэрыяльных каштоўнасцей без адпаведных суправаджальных дакументаў. Тавар на суму больш за 152 млн руб. канфіскаваны ў даход дзяржавы.

ЗВЭС працягвае рэканструкцыю тэлефоннай сеткі: састарэлы медны кабель замяняецца оптыка-валаконнай сеткай (GPON), паслугамі якой ужо карыстаюцца 1.348 абанентаў. Сёлета запланавана пераключыць на GPON-сетку 26 шматкватэрных дамоў. У 11 ужо вядуцца работы па ўстаноўцы аптычных разетак, якія прызначаны для падключэння ўсіх паслуг «Белтэлекам» — byfly, ZALA, тэлефанія і г.д. — і паляпшэння іх якасці.

На чыгуначнай станцыі Дараганава за студзень-люты рэалізавана 3.680 квіткоў: 195 пасажыраў скарысталіся паслугамі цягнікоў міжрэгіянальных і 3.485 — рэгіянальных ліній эканом-класа.

“Мясная лаўка” адкрылася ў канцы лютага ў краме “Родны кут” на вул. Чарняхоўскага. Наведвальнікаў тут радуюць бюджэтныя цэны, а гурманаў — яшчэ і наяўнасцю ў продажы індычкі, качкі і нават перапёлак. Штодзённая выручка крамы складае больш за 4 млн руб. Забяспечвае яе шырокі асартымент: каля дзясятка відаў паўфабрыкатаў уласнай вытворчасці, больш за 40 найменняў замарожанай і каля 20 — астуджанай прадукцыі са свініны, ялавічыны, птушкі.