“За любімую Беларусь!” — так называлася рэспубліканская акцыя БРСМ, прымеркаваная да 14 лютага, у якой прыняла ўдзел і асіповіцкая моладзь. Напрыклад, члены маладзёжнай суполкі Осаўскага ВПК дзіцячы сад-базавая школа раздавалі ў школе чырвона-зялёныя сардэчкі, падрыхтавалі валянцінку свайму куміру — Георгію Калдуну. А пераможцамі святочнай конкурснай праграмы сталі Яўгенія Максіменя і Міша Еўдакімовіч.

ААТ “ААБ Беларусбанк” узнаўляе прыём заяў (заявак, якія паступаюць праз карпаратыўны сайт і кантакт-цэнтр банка) на выдачу фізічным асобам крэдытаў на фінансаванне нерухомасці і спажывецкія патрэбы.

Больш якасны і хуткі інтэрнэт будуць мець асіпаўчане ўжо ў сакавіку-красавіку: запланавана адкрыццё дадатковых высакахуткасных патокаў, што дазволіць знізіць існуючыя нагрузкі.

Аб’ём вытворчасці прадукцыі на Асіповіцкім вытворчым участку ААТ “Бабруйскі камбінат хлебапрадуктаў” у студзені ў параўнанні з аналагічным леташнім перыядам у супастаўных цэнах узрос на 25%, у валавым выражэнні — на 21%.

120 тон бярозавіку плануе нарыхтаваць вясною ААТ “Асіповіцкі кансервавы завод”. Гэта дасць магчымасць выпусціць як чыста бярозавы, так і купажыраваныя сокі.

Установы дашкольнай адукацыі Асіповіччыны наведвае 2.108 хлопчыкаў і дзяўчынак, з якіх 383 — дзеці да трох гадоў. 455 малых прымуць дзіцячыя сады ў верасні бягучага года.

Аглядавая камісія Свіслацкага сельвыканкама за студзень-люты ўжо абследавала 222 домаўладанні. Найперш увага надзяляецца тым, дзе пражываюць ветэраны Вялікай Айчыннай вайны, адзінокія пажылыя людзі, сем’і, якія знаходзяцца ў сацыяльна небяспечным становішчы. Вядзецца актыўная работа з непрацуючымі грамадзянамі.

9.418 цялят плануецца атрымаць сёлета ў нашых сельгаспрадпрыемствах. Як паведамілі ў філіяле па Асіповіцкім раёне РУСВП “Магілёўскае дзяржплемпрадпрыемства”, пры дасягненні запланаванага колькасць прыплоду ўзрасце на 1.300 галоў у параўнанні з 2014 годам.