З дапамогай грамадскіх пунктаў аховы правапарадку, якія існуюць пры сельсаветах, за студзень-снежань працаўладкаваны 61 чалавек.

На тэрыторыі Татаркаўскага сельсавета знаходзіцца 8 пустуючых дамоў. Рыхтуюцца дакументы на ліквідацыю дзвюх пабудоў. У апошні час тут пазбавіліся ад 5 несанкцыянаваных сметнікаў, часткова замянілі агароджу на могілках, палепшылі вулічнае асвятленне.

Ёмістасць тэлефонных сетак раёна складае 24.172 нумары: 17.143 — у горадзе, 7.029 — на сяле. З 16 снежня асіпаўчане могуць падключаць дадатковыя каналы на паслугі эфірнага тэлебачання.

Свята, прымеркаванае да 40-годдзя з дня ўтварэння і 10-годдзя з дня атрымання звання “ўзорны”, заўтра адзначыць цымбальны аркестр дзіцячай школы мастацтваў № 1. Яно пачнецца ў раённым Цэнтры культуры і адпачынку ў 15.30.

У раённым цэнтры народных рамёстваў праходзіць калядная выстава, на якой прадстаўлены работы народных майстроў па лоза- і саломапляценні, ткацтву, вышыўцы, кераміцы.

Грамадскае харчаванне райспажыўтаварыства прадстаўлена пяццю аб’ектамі, тавараабарот якіх за 11 месяцаў склаў 809 мільёнаў рублёў. Уласнай прадукцыі выраблена на  917,2 мільёна.

Як паведамілі ў КДУП ЖКГ “Адзіны разліковы цэнтр”, сума пратэрмінаванай запазычанасці землякоў за жыллёва-камунальныя паслугі па 2.364 асабовых рахунках на 1 снежня склала 501 млн рублёў. Толькі “Райсэрвісу” за аказаныя паслугі кліенты не заплацілі 377 мільёнаў. АРЦ нагадвае, што паказанні лічыльнікаў неабходна перадаваць па тэлефонах 115, 24-5-87 і 24-0-19 з 10 па 25 чысло.

Рэстаран “Юбілейны” распачаў правядзенне пераднавагодніх вечароў. Адпачываючым прапануецца святочнае меню са стравамі, аформленымі па-святочнаму. Сярэдні кошт аднаго заказу —  350 тыс. рублёў. Сустрэча Новага года ў “Юбілейным” будзе каштаваць даражэй: у госці прыйдуць Дзед Мароз, Снягурка і іншыя казачныя персанажы.

Раённы цэнтр творчасці дзяцей і моладзі з 23 снежня дае старт навагоднім ранішнікам у школах — заяўкі на паслугу атрыманы яшчэ ў кастрычніку. Дзед Мароз і Снягурка са сваімі віншаваннямі прыйдуць на святочны “агеньчык” і да ветэранаў педагагічнай працы. А з 22 чысла ў РЦТДіМ пачынаецца традыцыйная калядная выстава дзіцячых работ дэкаратыўна-прыкладнога мастацтва.

Гандлёвыя кропкі горада і раёна вядуць актыўны продаж навагодніх падарункаў. Усе крамы ААТ “Гандаль” зрабілі для пакупнікоў салодкасцей прыемныя скідкі. Магазінам “Цэнтральны” ўжо рэалізавана насельніцтву розных ласункаў на 280 млн рублёў. У асноўным гэта прадукцыя “Камунаркі”.