Увазе кіраўнікоў: 1 ліпеня прызнаны страціўшымі сілу патрабаванні 34 правілаў пажарнай бяспекі. Азнаёміцца з “Правіламі пажарнай бяспекі Рэспублікі Беларусь”, а таксама з практычным дапаможнікам “Пажарная бяспека арганізацыі (прадпрыемства) для кіраўнікоў аб’ектаў рознага функцыянальнага прызначэння” можна на сайце МНС (http://mchs.gov.by/rus/main/regulations/tnpa/ppb/).

У Лапіцкім сельсавеце скончаны рамонтныя работы на спартыўнай пляцоўцы ў п. Сасновы, прыведзены ў парадак Лочынскія могілкі, адрамантаваны з частковай заменай штыкетнік: у аг. Жорнаўка – 186 метраў, у в. Лочын – 200. Зараз у сельсавеце рыхтуюцца да Дня пажылых людзей: на падначаленай тэрыторыі пражывае больш за 600 пенсіянераў.

Стаянка па за-хоўванні транспартных сродкаў прыватнага ўнітарнага прадпрыемства “Асіповіцкая аўтамабільная школа” ДТСААФ штомесяц прымае каля 50 “жалезных коней”. Суткі знаходжання на ёй каштуюць аўтаўладальнікам 10.300 рублёў. У пастаянных кліентаў попытам карыстаюцца месячныя абанементныя білеты – за тры тыдні верасня іх прададзена ўжо 37.

Яблыневы сад АСВК “Калгас “Лапічы”, які раскінуўся на  41 гектары, ужо які год прыносіць нядрэнны ўраджай. З пладаносных дрэў, што размешчаны на 20 га, у гэтым сезоне чакаецца ўраджай на ўзроўні леташняга – каля 30 тон. Гатункі ў садзе ў асноўным познія, таму зараз ідзе збор ападаў. Iх для патрэб кансервавага завода ўжо перададзена больш за 4 тоны.

У кафэ “Юнацтва” ААТ “Гандаль” штодня ў абедзенны час прыходзіць каля 30 чалавек: тут кормяць смачна і нядорага – комплексны абед каштуе ад 30 да 34 тысяч. Таксама гэтае месца – выдатны выбар для правядзення ўрачыстасцей: у выхадныя дні жніўня тут прайшло 10 юбілеяў і 2 вяселлі.

За жнівень аўтастанцыяй было прададзена 7.857 разавых і 58 праязных квіткоў на аўтобусы прыгарадных напрамкаў на агульную суму 94.171.300 рублёў.