Адкрыты чэмпіянат краіны “Лесаруб-2014” сёння стартаваў у Асіповічах, заўтра — другі дзень барацьбы за званне лепшых. Мерапрыемствы на стадыёне “Алімпіец” распачнуцца ў 9 гадзін: 9-12.30 — стэндавыя спаборніцтвы валь-шчыкаў лесу, аператараў харвестараў, фарвардараў, гідраманіпулятараў, з 12 да 13 — рыцарскі турнір, з 14 да 15 — эстафета. Цырымонія ўзнагароджання ўдзельнікаў і ўрачыстае закрыццё чэмпіянату распачнецца ў 16 гадзін.

60 тысяч тон збожжа новага ўраджаю прынята Асіповіцкім вытворчым участкам ААТ “Бабруйскі камбінат хлебапрадуктаў” з розных раёнаў Магілёўшчыны і іншых абласцей краіны. Штодзень сюды дастаўляецца чыгуначным і аўтамабільным тарнспартам каля 3 тысяч тон хлебнага багацця.

На 46-й пазіцыі са 118 раёнаў Беларусі знаходзіцца Асіповіччына ў рэйтынгу вытворчасці малака і мяса па выніках I паўгоддзя. Атрымана 16.302 тоны малака — па 2.318 кг ад каровы.

Асноўныя работы па добраўпарадкаванні, выкананыя на тэрыторыі Ясенскага сельсавета ў ліпені, — скошванне травы і пустазелля, ліквідацыя несанкцыянаваных сметнікаў. Апошніх, дарэчы, было восем. У жніўні заменена 270 метраў штыкетніку на станцыі Ясень.

На падрыхтоўку ўстаноў адукацыі да новага навучальнага года з раённага бюджэту было выдзелена 2 млрд. 933,6 млн. рублёў.

Дыплом I ступені на Міжнародным фестывалі “Пад крыламі Арыёна” заваяваў 17-гадовы асіпаўчанін Руслан Пілахоўскі — сёлетні выпускнік СШ № 3.

Рыхтуецца да выдання другі зборнік гумару і сатыры асіповіцкага паэта, заслужанага работніка культуры Анатоля Тамашэўскага. Думаецца, ужо сама назва — “Людзі — не анёлы” — раскрывае лейтматыў будучай кнігі.

З 11 жніўня на тэрыторыі раёна з мэтай прафілактыкі дамашняга насілля праводзілася спецыяльнае комплекснае мерапрыемства “Быт”. Супрацоўнікамі міліцыі наведана каля чатырох дзясяткаў сем’яў і асоб з асацыяльнымі паводзінамі.

Новы аўтамабіль МАЗ-Купава набыты для перасоўнага аддзялення сувязі № 1. Ён хутка выйдзе на маршрут Асіповічы-Дрычын. Па-сучаснаму абсталяваная тэхніка — з гандлёвай вітрынай, рабочым месцам, тэрміналам для пластыкавых картак — дазволіць узняць якасць абслугоўвання насельніцтва.

Сем пар двайнят нарадзілася ў раёне за студзень-чэрвень, тады як у мінулым годзе за такі ж час — дзве. Найбольш папулярныя сёлета дзіцячыя імёны — Дар’я, Кацярына, Ксенія, Арцём, Аляксей, Максім. Сярэдні ўзрост матуль — 27 гадоў, тат — 30.