Выдача прыватызацыйных чэкаў “Маёмасць” пачалася два дзясяткі гадоў таму. Большасць грамадзян уклалі іх у акцыі, аднак некаторыя дасюль не вырашылі, што рабіць з каштоўнымі паперамі. З гэтым пытаннем можна звярнуцца ў ЦБП № 722 філіяла № 703 ААТ “ААБ Беларусбанк”, спецыялісты якога прапануюць спіс арганізацый, у акцыі якіх яшчэ можна ўкласці чэкі.

За паўгода ва ўпраўленне па працы, занятасці і сацыяльнай абароне райвыканкама паступіла  253 звароты, абсалютная большасць якіх — 244 — тычылася прадастаўлення матэрыяльнай дапамогі. Выплаце пенсій, захаванню пенсіённага заканадаўства было прысвечана 5 зваротаў. Па аднаму паступіла аб аплаце працы, выплаце дапамогі пры звальненні, змяшчэнні ў дом-інтэрнат і занятасці. Таксама было дадзена 2 адказы на звароты, пераадрасаваныя з адпаведнага Міністэрства.

У сувязі з анамальнай для жніўня спякотай чыгуначныя рэйкі часам награюцца больш як на 50°С, і тады тэмп руху цягнікоў на   ўчастках бесстыкавога пуці змяншаецца: пасажырскія саставы перамяшчаюцца з хуткасцю не больш за 80, грузавыя — 60 кіламетраў у гадзіну. Такое абмежаванне адбываецца ў пік дзённай спякоты: з 13 да 19 гадзін. На графіку руху цягнікоў адметна гэта не адбіваецца.

Газіраваныя напоі і марожанае летнімі дзянькамі карыстаюцца асаблівым попытам. Колькасць іх спажывання прама прапарцыянальна вышыні тэмпературнага слупка. У адным толькі магазіне № 18 за ліпень прададзена пітной і газіраванай вады “Дарыда” на 16 мільёнаў рублёў (летась за такі ж перыяд на 12 млн. руб.), а “Кола”, “Фанта” і “Спрайт” прынеслі ў казну 35 млн. руб. (28 млн.). А вось марожанага пакупнікі набылі амаль удвая больш за мінулы год: 45,2 млн. руб. аддалі за яго сёлета і толькі 27,5 — летась.

Карытненскі сельсавет. Стварэнне ўмоў для камфортнага пражывання насельнікаў — галоўны клопат. Зараз, напры-клад, праводзіцца рамонт парканаў з наступнай афарбоўкай у вёсках Старое Сяло, Карытнае, Караны. Спілаваны аварыйныя дрэвы на могілках у Каранах. Заахвочваюць тут і кветкаводаў, клапоцяцца аб зборы ў школу дзяцей з 4 мнагадзетных сямей, не абыходзяць увагай ветэранаў.