Пазапланавая акцыя “Бяспечнае лета” праходзіць на тэрыторыі Асіповіччыны з 7 ліпеня і да канца летніх канікул. Яе мэта — папярэдзіць дарожна-транспартныя здарэнні з удзелам непаўналетніх.

Статус шматдзетных мае 458 нашых сямей, дзе пражывае 4.900 чалавек, з якіх  811 дзяцей  атрымаюць матэрыяльную дапамогу, каб падрыхтавацца да школы.

289 чалавек праходзяць аздараўленне ў дзіцячым санаторыі “Свіслач”, на базе якога летам працуе і аздараўленчы лагер. Зараз у ім адпачывае 49 падлеткаў. У суправаджэнні аднаго з бацькоў папраўляе здароўе і 31 дзіця-інвалід.

Райпалівазбыт за студзень-чэрвень рэалізаваў насельніцтву 442 тоны торфабрыкету і 573 кубаметры парэзаных на цуркі ці паколатых дроў. З  285 домаўладальнікаў, якія набылі паліва, 90 льготнікаў.

Як паведамілі ў сектары гандлю і паслуг райвыканкама, за I паўгоддзе адкрыта 8 гандлёвых аб’ектаў агульнай плошчай 539 квадратных метраў. Сярод іх — “Дабраном” па вуліцы Чарняхоўскага, “Мегастэп”, “Западхимторг”.

Праполкай і паліваннем замацаванай за ДУКВП “Райсэрвіс” кветкавай зоны горада на ўчастку 400 “квадратаў“ займаецца зараз 11 чалавек. Штатным рабочым дапамагаюць 8 школьнікаў.

Асіповіцкі цэх ультракароткахвалевых радыёстанцый (тэлестанцыя) транслюе 8 праграм радыё і 2 лічбавыя пакеты тэлепраграм: бясплатны і камерцыйны. У снежні плануецца ўвядзенне ў дзеянне яшчэ аднаго — ён павінен ахапіць астатнія праграмы пакета “ZALA”.

У Ясенскім сельсавеце нядаўна ліквідавана 6 безгаспадарчых дамоў: 4 — у Заельніку,  2 — у Асяродку. Зроблены частковы рамонт агароджы на могілках.

Мясцовым аўтапаркам за студзень-чэрвень перавезена амаль 2,5 мільёна пасажыраў, у тым ліку каля 225 тысяч чалавек на прыгарадным транспарце, каля трох — аўтобусамі нерэгулярных рэйсаў. Усяго існуе             38 маршрутаў. З пачаткам летняга сезона ўзнавіўся маршрут Асіповічы-Смык, а таксама магчымасць праезду ў пасёлкі Дружба і Ніччо.