У адборачным абласным спаборніцтве па спартыўным скалалазанні на штучным рэльефе ў сярэдняй узроставай групе навучэнец аб’яднання па інтарэсах “Мерыдыян” АРЦТДіМ Iлля Шалягін (педагог А.Карчэўскі) атрымаў перамогу, а затым прыняў удзел у рэспубліканскіх стартах.

У рамках краязнаўча-пазнавальнага праекта “Ён наш зямляк. Ён наш гонар” Асіповіцкай бібліятэчнай сеткай праводзяцца мерапрыемствы, што расказваюць пра людзей, якія праславілі наш край. Наведвальнікі бібліятэк ужо пазнаёміліся з творчасцю народнага мастака Уладзіміра Стэльмашонка, паэтамі Анатолем Тамашэўскім і Тамарай Кавальчук, дзейнасцю вучонага Уладзіміра Сцепанчука. А нядаўна для членаў клуба “Добрыя сустрэчы” правялі літаратурную гасціную “Савецкі граф А.Талстой”.

У Дараганаўскім комплексным краязнаўчым музеі адбылася рэканструкцыя экспазіцыйных залаў, якія папоўніліся новымі экспанатамі. У ліку іх — калекцыя мясцовых ручнікоў, прадметы мэблі пана Дарагана, бандарныя вырабы, работы народных умельцаў.

Асіповіцкі камбінат грамадскага харчавання падрыхтаваў да Дня жанчын разнастайную прадукцыю са святочнай атрыбутыкай: торты і пірожныя мядовыя, пірагі адкрытыя з 5-цю напаўняльнікамі, пячэнне. Вырабы можна набыць у павільёнах № 1 і “Булачная”, заказаць непасрэдна на прадпрыемстве.

Ліпенскім сельсаветам з пачатку года выдадзена 84 даведкі аб месцы жыхарства і складзе сям’і, 4 — аб знаходжанні на ўліку маючых патрэбу ў паляпшэнні жыллёвых умоў, 15 — што ў дадзеным населеным пункце грамадзянін займае жылое памяшканне. Зроблена 2 актавыя запісы аб нараджэнні дзіцяці, 5 — аб смерці, 1 — аб устанаўленні бацькоўства. 6 чалавек звярнуліся для рэгістрацыі па месцы жыхарства, 1 — па месцы знаходжання, 12 жыхароў — для абмену ці выдачы пашпарта.