Асіповічы: коратка аб розным
Месячнік грамадскага кантролю за захаваннем тэмпературнага рэжыму на рабочых месцах праводзяць прафсаюзы на працягу снежня. Тэлефоны “гарачых ліній” у Магілёве — 8 (0222) 22-98-25, 31-12-43. Тэхінспектары працы гатовы выехаць на месца і праверыць інфармацыю.
Работнікі УКП ЖКГ упрыгожылі вуліцы рознакаляровымі электрычнымі гірляндамі, светлавымі шнурамі і фігурамі, вулічнымі свяцільнямі. Заменены на больш сучасныя 2 светлавыя фантаны ў цэнтры горада, на ёлках дадаліся шары і святлодыёдны дождж, сістэматызавана колеравая гама іх святочнага “строю”.
Ва ўпраўленні чыгункі падвялі вынікі конкурсу сярод ветэранаў на лепшую публікацыю-ўспамін у газеце “Чыгуначнік Беларусі”, прысвечаную 155-годдзю магістралі. II месца ў намінацыі “Дорога железная, а люди золотые” — у намесніка старшыні савета ветэранаў Асіповіцкага вагоннага дэпо Алы Луханінай.
Выхаванцам спецшколы накіраваны сродкі ад каляднага дабрачыннага балю, што прайшоў у Белдзяржуніверсітэце. Там адбыўся аўкцыён, на якім каля 300 студэнтаў вырашылі аказаць дапамогу хворым дзецям, каб свята стала для іх незабыўным.
Ва ўпраўленні па працы, занятасці і сацабароне райвыканкама паведамілі, што на 1 снежня на ўліку знаходзілася 207 чалавек, з іх 151 беспрацоўны. Маецца 375 вакансій, сярод якіх пераважаюць вадзіцелі катэгорыі Е і D, урачы, заатэхнікі. За 11 месяцаў працаўладкавалі 1169 грамадзян, з іх 696 беспрацоўных. 5 юнакоў і дзяўчат атрымалі першае рабочае месца па праграме “Маладзёжная практыка”.
