У Лапіцкім сельсавеце стараюцца падтрымліваць парадак на зямлі. Тут актыўна вядзецца абкошванне пустазелля ў месцах агульнага карыстання. Замянілі 100 метраў драўлянай агароджы на новую. Складзена 8 пратаколаў на гаспадароў участкаў, тэрыторыя якіх патрабуе добраўпарадкавання, у тым ліку 3 — на праўленне СВК “Калгас “Чырвоны ўдарнік”. Акрамя гэтага, працягваецца работа па заключэнні дагавораў з грамадзянамі на цэнтралізаваны вываз смецця.

Першы эксперыментальны выпуск навучэнцаў, якія атрымлівалі ў мясцовым каледжы сярэднюю спецыяльную адукацыю, адбудзецца ў канцы чэрвеня. Дыпломы тэхнікаў-будаўнікоў атрымае 21 чалавек, 12 з якіх вучыліся на дзённым, 9 — на вячэрнім аддзяленні. Усяго навучальную ўстанову сёлета заканчваюць 130 юнакоў і дзяўчат.

Для скошвання травы на ўзбочынах вуліц горада камунальнікі штодня задзейнічаюць 6 трымераў або кустарэзаў і 4 газонакасілкі, у тым ліку — 3 трактарныя. Працаўнікі аказваюць такую ж платную паслугу насельніцтву: скасіць адну сотку каштуе 41 тысячу рублёў. З пачатку чэрвеня па яе звярнулася каля 20 грамадзян.

Электроннымі праязнымі дакументамі на цягнікі міжрэгіянальных і рэгіянальных ліній бізнес-класа штодня карыстаюцца некалькі дзясяткаў асіпаўчан. Па словах работнікаў вакзала, з пачатку чэрвеня з’явілася магчымасць электроннай рэгістрацыі і на цягнікі, якія ідуць у Літву. Раней у міжнародных зносінах такая паслуга была даступная на паязды, што курсіруюць у Расію і Латвію.