Райэнергаінспекцыяй Бабруйскага філіяла “Энерганагляд” РУП “Магілёўэнерга” з пачатку года дапушчана ў эксплуатацыю 44 новыя домаўладанні, праведзена 868 прафілактычных гутарак з насельніцтвам па бяспечнай эксплуатацыі энергасетак і распаўсюджана 1305 памятак. Па выніках праверкі 271 жылога домаўладання выдадзена 238 прадпісанняў на ліквідацыю заўваг па тэхнічным стане і пажарнай бяспецы.

У Ясенскім сельсавеце, дзе зараз пражывае 800 чалавек, у ліку якіх 103 пенсіянеры і 70 непаўналетніх, за студзень-чэрвень выдадзена 166 даведак, з іх 136 — аб месцы жыхарства і складзе сям’і, 12 — займаемым жылым памяшканні, 13 — рэгістрацыі па месцы жыхарства, 11 — аб праве рэалізацыі прадукцыі, вырабленай у асабістай падсобнай гаспадарцы; 4 жыхары атрымалі і 11 абмянялі пашпарты. Складзена 10 актаў аб смерці і 1 — аб устанаўленнi бацькоўства. У сельсавеце з’явілася новая сям’я і нарадзіліся 4 дзіцяці.

13 саветамі грамадскіх пунктаў аховы правапарадку за паўгоддзе праведзена 108 пасяджэнняў. З 848 грамадзян, разгледжаных на пасяджэннях, 74 аказана садзейнічанне ў працаўладкаванні, 50 накіравана для лячэння ў нарколага-псіхіятра, 16 — у лячэбна-працоўны прафілакторый. Усяго за гэты час у ЛПП дастаўлена 38 чалавек, у тым ліку 26 сямейных скандалістаў.

У аварыйную службу Асіповіцкага раёна газазабеспячэння філіяла “Бабруйскае вытворчае ўпраўленне” РУП “Магілёўаблгаз” з пачатку года паступіла 94 аварыйныя заяўкі і 791 — на рамонт газавага абсталявання. У службу “Адно акно”, якая дзейнічае па заяўным прынцыпе, па пытаннях мантажу і перамантажу абсталявання звярнулася 1087 землякоў.

У КДУП “Адзіны разліковы цэнтр” паведамілі, што на пачатак ліпеня 68 землякоў з сацыяльна неабароненых слаёў насельніцтва атрымліваюць безнаяўныя субсідыі на аплату паслуг ЖКГ.

У сералагічнай лабараторыі райпаліклінікі метадамі мікрарэакцыі прэцыпітацыі і імунаферментнага аналізу праведзена 10150 абследаванняў жыхароў раёна на венерычныя захворванні: 7305 на сіфіліс і 2845 на ганарэю.